“Yslam döwletiniň” nöker toplaýjysy Duşenbede 21 ýyl tussaglyga höküm edildi
Täjigistanly, “Yslam döwleti” toparynyň ýakasy gaýyşly nöker toplaýjysy Parwiz Saidrahmonow (Abu Dowud) noýabrda terrorçylyk aýyplamasy bilen 21 ýyl azatlykdan mahrum edildi diýip, Täjigistanyň Ýokary kazyýetiniň resmisi 16-njy fewralda aýtdy.
Resmileriň aýtmaklaryna görä, 35 ýaşly Saidrahmonow sentýabr aýynda Türkiýeden ekstradisiýa edilip, 11-nji noýabrda Duşenbe şäherinde terror toparyny guramak, ekstremizm we daşary ýurtda söweşjek adamlary hakyna tutmak aýyplamalary esasynda türme tussaglygyna höküm edilipdir.
Saidrahmonowyň kazyýet işi barada mundan öň resmi habar berilmedi we Ýokary kazyýetiň oňa garşy üç aý mundan ozal çykarylan höküm barada näme üçin şu günki günde habar berilýändiginiň sebäbi düşündirilmedi.
Habar beriş serişdeleriniň käbiri, çeşmelere salgylanyp, prokurorlaryň oňa ömürlik türme tussaglygyny sorandyklaryny aýtdy.
Şwesiýada, Russiýada we Täjigistanda guralan terror hüjümleri bilen ilteşikli bolmakda güman edilýän Saidrahmonow 2014-nji ýylda Yraga baryp, “Yslam döwleti” terror guramasyna goşulmazyndan öň Russiýada migrant işçi bolupdy.
Soň ol siriýa häkimiýetleri tarapyndan tussag edildi we 2020-nji ýylyň ortalarynda, Täjigistan onuň Duşenbä ekstradisiýa edilmegini gazanjak bolýan wagtynda Siriýanyň Afrin şäherindäki türmeden ýitirim boldy.
Biraz soň türk häkimiýetleri onuň öz tussaghanalarynda saklanýandygyny aýtdylar.