Täjik syýasatçysynyň ogly Germaniýadan ekstradisiýa edilip, ýedi ýyl tussaglyga höküm edildi
Adam hukuklaryny goraýan "Human Rights Watch" (HRW) guramasy geçirilen kazyýet seljermesiniň adalatsyz bolandygyny aýtdy.
HRW-nyň maglumatyna görä, täjik paýtagtyndaky kazyýet Abdullo Şamsiddini 29-njy martda, "Täjigistanyň konstitusion gurluşyny zorlukly üýtgetmek barada açyk çagyryş" etmekde günäkär tapanyndan soň, ýedi ýyl türme tussaglygyna höküm etdi.
"Kazyýet işi 28-nji martda başlandy we adalatly kazyýet standartlaryna laýyk gelmedi, şol sanda aýyplanýanlaryň bar bolan maglumatlar esasynda özlerine garşy ulanylýan subutnamalara garşy çykmak hukugyny hem bozdy” diýip, HRW aýtdy.
“Häkimiýetler iş kesilmegini esaslandyrmak üçin ulanylan subutnamalary aç-açan görkezmeli we şu aralykda ony haýal etmän tussaglykdan boşatmaly” Adam hukuklaryny goraýan guramanyň beýanatynda aýdylýar.
Täjik häkimiýetleri bu hökümi entek resmi taýdan tassyklamady, ýöne Şamsiddiniň häzir Ýewropada ýaşaýan kakasy Şamsiddin Saidow AÝ/AR-a öz ogluna ýedi ýyl türme tussaglygy höküminiň çykarylandygyny tassyk etdi.