Tanymal türkmen tälimçisi Gurban Berdiýew "Soçiden" gitdi
Türkmenistanly tälimçi Gurban Berdiýew Russiýanyň “Soçi” klubunyň baş tälimçisi wezipesinden gitdi diýip, “Türkmenportal” neşiri bu toparyň ýolbaşçylar düzümine salgylanyp habar berýär.
Habarda aýdylmagyna görä, “Soçi” klubynyň ýolbaşçylary Gurban Berdiýew bilen hoşlaşmak kararyna gelipdirler.
Hökümetçi neşir Gurban Berdiýewiň tälim bermeginde “Soçiniň” futbolçylarynyň 5 duşuşyk geçirip, iki gezek utandyklaryny, üç gezek bolsa utulandyklaryny belleýär.
Gurban Berdiýew “Soçiden” öň, geçen ýylyň awgustynda berlen habara görä, Eýranyň “Traktor” klubunyň oýunçylaryna tälim bermäge bardy.
1952-nji ýylda doglan Gurban Berdiýew 1971-1985-nji ýyllar aralygynda Aşgabadyň “Kolhozçy”, Don boýundaky Rostowyň SKA, “Rostelmaş”, Gazagystanyň “Kaýrat” toparlarynda futbol oýnap, bir gezek Gazagystanyň çempiony boldy.
Metbugat maglumatlaryna görä, G.Berdiýew tälimçilik işine 1986-njy ýylda Gazagystanyň “Himik” toparynda başlap, soňra Gazagystanyň “Kaýrat”, “Kaspi”, Türkiýäniň “Gençlerbirligi”, Aşgabadyň “Nisa”, Russiýanyň “Kristall”, “Rubin”, “Rostow” toparlarynda tälimçi bolup işledi, 2017-nji ýylda dünýäniň iň gowy 50 tälimçisiiniň sanawyna girdi.
Türkmenistanda türgenler we tälimçiler üçin döredilendigi aýdylýan gowy şertlere we mümkinçiliklere garamazdan, G.Berdiýew, näme üçindir, Türkmenistana dolanmaýar.