Gazak polisiýasy saýlaw netijelerini sorag astyna alan ýygnanyşyk sebäpli iki oppozisioneri tussag etdi
Gazagystanyň polisiýasy ýurduň iň uly şäheri Almatyda oppozisiýa syýasatçysy Muhtar Taýžany, günbatardaky Oral şäherinde bolsa žurnalist Lukpan Ahmedýarowy 9-njy aprelde geçen aý geçirilen parlament saýlawlarynyň netijelerine garşy guralan ýygnaklara gatnaşandyklary üçin tussag etdi.
Taýžan we Ahmedýarow sosial ulgamlarda polisiýanyň özlerini 12-nji aprelde, köpçülikleýin ýygnanyşyklary geçirmek düzgünlerini bozmakda aýyplap tussag edendigini aýtdylar. Almatydaky kazyýet günääli diýip tapanyndan soň, Taýžan 15 gün azatlykdan mahrum edildi.
Ahmedýarowyň hökümi entek çykarylanok. Taýžan we Ahmedýarow 9-njy aprelde öz şäherlerinde rugsat berilmedik ýygnanyşyklara gatnaşyp, täze parlament saýlawlarynyň geçirilmegini talap etdiler.
Olaryň ikisi hem 19-njy martda geçirilen ses berişlige garaşsyz kandidat hökmünde gatnaşmakçy boldy, ýöne bu başa barmady.
Saýlawlarda dolandyryjy partiýa, “Amanat” parlament orunlarynyň köplügine eýe boldy, garaşsyz kandidatlaryň köpüsi saýlawlaryň galplaşdyrylandygyny öňe sürdi.