Täjigistanda Dagly-Badagşan sebitiniň näresmi lideriniň ýene bir dogany saklandy
Täjik resmileri dartgynly Dagly-Badagşan sebitiniň tussaglykdaky näresmi lideri Tolib Aýombekowyň ýene bir doganyny sakladylar.
Bu Merkezi Aziýa döwletiniň kanun goraýjy edaralaryndaky çeşmeleriň 18-nji aprelde Azatlyk Radiosyna aýtmagyna görä, Raşid Aýombekow mundan dört gün öň Dagly-Badagşanda saklanypdyr. Ýakynlary onuň häzir tussaghanada saklanýandygyny, şeýle-de onuň hiç hili jenaýaty amala aşyrmandygyny aýdýarlar.
Tolib Aýombekow uzak wagtdan bäri Täjigistandaky awtoritar režime garşy çykyp gelýär. Ol 1990-njy ýyllardaky graždançylyk urşunda hökümet güýçlerine garşy söweşipdi. Emma 1997-nji ýylda Moskwanyň araçylyk etmeginde gelnen ylalaşyga laýyklykda, ol we beýleki “meýdan kommandirleri” hökümetiň düzümine goşuldy.
Geçen noýabrda Tolib Aýombekow we onuň ençeme egindeşi, birnäçe aýyplamalar esasynda, ömürlik türme tussaglygyna höküm edildi. Mundan soň, onuň üç ogly we iki dogany hem jenaýat jogapkärçiligine çekilip, türmä höküm edildi.
Geçen maýda polisiýa Dagly-Badagşan sebitinde ýüze çykan protestleri gazaplylyk bilen basyp ýatyranyndan soň, bu sebitiň näresmi liderlerine we aktiwistlerine basyşlar güýçlendi.