Berdimuhamedow Halkara futbol federasiýasynyň ýolbaşçysy bilen duşuşdy
Prezident Serdar Berdimuhamedow Aşgabadyň Olimpiýa şäherçesiniň “Olimpiýa” stadionynda Halkara Futbol federasiýasynyň — FIFA-nyň prezidenti Janni Infantino bilen duşuşdy diýip, türkmen metbugaty 4-nji maýda habar berdi.
“Biz FIFA-nyň tutuş dünýäde hem-de ýurdumyzda futboly mundan beýläk-de ösdürmek boýunça başlangyçlaryny we tekliplerini goldamaga taýýardyrys. Öz tarapymyzdan halkara futbol ýaryşlaryny, türgenleşiklerini we ýoldaşlyk duşuşyklaryny guramak üçin, Türkmenistanyň sport düzümlerini ulanmak mümkinçiligini öwrenmegi teklip edýäris” diýip, Serdar Berdimuhamedow Türkmenistana bir günlük sapara gelen myhman bilen söhbetdeşilikde aýtdy.
Janni Infantino türkmen prezidentine FIFA-nyň ýörite futbol lybasyny, resmi topuny, FIFA-nyň ýörite nyşanyny sowgat berdi.
Janni Infantino hökümet başlygynyň orunbasary N.Amannepesow bilen bolan duşuşygynda Türkmenistanda futboly hem-de, umumy maksatlarydyr wezipeleri nazara almak bilen, bu ugurdaky hyzmatdaşlygy ösdürmek babatdaky meseleleri maslahatlaşdy diýip, habarda aýdylýar.
Dünýäniň esasy futbol guramasynyň ýolbaşçysy we wekiliýetiň agzalary Halkara ahalteke atçylyk sport toplumyna hem baryp gördüler. Bu ýerde myhmanlar üçin “Galkynyş” milli at üstündäki oýunlar toparynyň çykyşy guraldy.