'Goşuna alynmak isleýärin'. Maryda ýaşlaryň harby bölüme ýüz tutmagy bilen bagly ýagdaýlar köpelýär
Mary welaýatynyň Baýramaly etrabynda orta mekdebini tamamlaýan mekdep uçurymlary harby wekilligine baryp öz islegleri bilen harby gulluga alynmagyny soraýarlar. Bu barada Azatlygyň habarçysy we ýerli çeşmeleri 6-njy iýunda maglumat berdiler.
Baýramalyda harby gulluga alynmagyny sorap, harby bölüme ýüz tutan ýaşlardan haýyşnama alynýar.
Harby wekilligiň işgärleri bilen gürleşen habarçymyzyň sözlerine görä, resmiler gulluga alynmak hakynda arza ýazan ýaşlaryň ozalky ýyllarda hem bolandygyny, emma şu ýyl köpelendigini mälim edipdir. Azatlyk Radiosynyň bu ýagdaý barada Baýramalydaky harby wekilligiň we Goranmak ministrliginiň resmilerinden maglumat almak synanyşygy netije bermedi.
Habarçymyz harby gulluga alynmagyny sorap, ýüz tutan ýaşlaryň ençemesi bilen gürrüňdeş boldy. Onuň sözlerine görä, şeýle ýaşlaryň köpüsi maddy ýagdaýy agyr bolan maşgalalardan.
"Orta mekdebini tamamlan ýaş oglanlaryň ençemesi 'biz näçe çalt harby gullugyna gidip, ir tamamlap gelsek, biz üçin gowy' diýýärler. Şeýle-de, olaryň arasynda 'öýde näme bar, her günki iýjek çöregimiz ölçegli. Günortanlyk nahar edinseň agşamkyň gaýgy' diýýänler hem bar. Olar 'gulluga gitsem hojalygymyzda bir adam az bolar' diýýärler" - dýip, habarçymyz aýdýar.
Azatlyk bilen gürleşen baýramalyly ýaşlar şu pursatda goşun gullugyna gitmekden başga hiç hili çykalga görmeýändigini, özlerinde işe ýerleşmäge ýa-da okuwyny dowam etdirmäge mümkinçiligiň ýokdugyny aýtdylar.
"Ýokary okuw jaýyna girmäge pul ýagdaýymyz ýok. Şol sebäpden bu barada pikir hem etmedik. Muny hemmeler bilýär, tanyşyň we puluň bolmasa ýokary okuw jaýyna girip hem bolmaýar, şol sebäpden arzuw hem etmeýäris. Ine çaltrak harby gullugy tamamlap gelsek, Russiýa, Tatarstana, Türkiýä işe gidip işläris" diýip, Azatlygyň habarçysy bilen anonim gürleşen ýaşlaryň biri aýtdy.
Şeýle-de bolsa, harby gulluga alynmagyny sorap, meýletin ýüz tutan ýaşlar gullukdan soňky geljegine uly umyt baglamaýandygyny aýdýarlar.
"Bize harby gullugy tamamlanymyzdan soň hem hezillik ýok. Öýlenjek pulumyzy özümiz tapmaly. Biz daşary döwletlere çykyp işläp bilsek hem hojalygymyzyň abatlamaly ýerleri bar, ene-atamyza goldaw bermeli, öýlenip toý etjek pulumyzy jemlemeli" diýip, esgerlige gitmekçi bolýan mekdep uçurymy gürrüň berdi.
Ýaşlaryň sözlerine görä, olaryň arzalary kabul edilende, jogaba garaşmalydygy aýdylypdyr, emma gulluga alynjak wagty takyklaşdyrylmandyr.
Habarçymyz ýaşlaryň gulluk etjek ýerlerini saýlamagy üçin käbir mümkinçilikleriň bardygyny aýdýar we munuň 400-1000 manat aralygyndaky resmi bolmadyk töleg bilen çözülýändigini belleýär.
Harby gulluk hökmany hasaplanýar, şertnama boýunça gulluk ýa-da alternatiw gulluk ýurtda göz öňünde tutulmaýar. Harby gulluga çagyryş ýylda iki gezek 1-nji aprelden 30-njy iýuna çenli we 1-nji oktýabrdan 31-nji dekabra çenli amala aşyrylýar.
Goşun gullugyndaky agyr şertler köpleri goşundan gaçmak üçin ýol gözlemäge mejbur edýär. Harby gullugy yza tesdirmek ýa-da boşadylmak adatça para bermek bilen amala aşyrylýar. Paranyň mukdary birnäçe müň amerikan dollaryna ýetýär.
Ýaragly güýçlerindäki agyr şertler, esgerlere ýowuzlyk, açlyk, lukmançylyk kömeginiň bolmazlygy, uly esgerleriň we harby ýolbaşçylaryň ýaşlara zulumy ýaly problemalar ýaşlaryň goşun gullugyny berjaý etmek islemezligine, olaryň ene - atalaryny bolsa, cagalaryny gullukdan alyp galmaga synanyşmagyna sebäp bolýar. Harby gulluga çagyrylanlaryň arasynda ölüm we ýaralanmalar ýaly pajygaly ýagdaýlar hem köpçülige ýygy-ýygydan mälim bolýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.