Pakistan türkmen gazyny dünýä bazarlaryna çykarmak üçin ýol hödürleýär
Pakistan metbugatynyň ýurduň nebit ministri Musadik Maligiň üçünji gün aýdan sözlerine salgylanyp ýazmagyna görä, Pakistan Türkmenistandan dünýäniň beýleki künjeklerine gaz ibermek üçin iň amatly ýol bolup durýar.
Ýokary derejeli resminiň sözlerine görä, Pakistan hökümeti Çaman serhedinden, owgan araçäginden Gwadara çenli gaz baglanyşygyny gurmak mümkinçiligini öwrenmek üçin Türkmenistana çakylyk iberdi.
Hindi ummanynyň kenaryndaky Gwadar portunda LNG, suwuklandyrylan tebigy gaz terminallaryny gurmak planlary bolup, bu türkmen gazlaryny Ýewropa we dünýäniň LNG bazarlaryna ibermek üçin ulanylyp bilner diýip, habarda aýdylýar.
“Dünýäniň energiýa paýtagty bolansoň, biz Merkezi Aziýanyň söwda hyzmatdaşy bolmak isleýäris. Biz Pakistana gaz geçirijisi arkaly gaz getirmegi teklip etdik. Türkmenistanda tasdan Kataryňka barabar ägirt uly gaz gorlary bar" diýip, Mälik aýtdy.
Ol ýewropalylaryň Pakistanda, şol sanda Gwadar portunda öz LNG terminallaryny döredip, suwuklandyrylan gazy şol ýerden gerek ýerlerine äkidip biljekdigini hem sözüne goşdy.
Pakistan resmisi munuň olar üçin alternatiwa bolup biljekdigini, Hytaýyň hem özüne zerur bolan LNG terminallaryny gurup biljekdigini aýtdy.