Türkmenistan Özbegistandan bäş aýda 649 tonna alma import etdi
Hökümetçi neşiriň Özbegistanyň resmi maglumatlaryna salgylanyp ýazmagyna görä, Türkmenistan şu ýylyň ýanwar-maý aýlarynda Özbegistandan 649 tonna alma import etdi.
Habarda bellenmegine görä, Özbegistan 2023-nji ýylyň bäş aýynda umumy bahasy 1,8 million amerikan dollaryna deň bolan 4,4 müň tonna almany daşarky bazarlara ugradypdyr.
Türkmenistan ýurdy bag-bossanlyga öwürmek programmasynyň çäginde ýylda millionlarça düýp agaç nahalynyň, şol sanda miweli baglaryň ekilýändigini aýdýar. Emma, goňşy Özbegistandan tapawutlylykda, bu işiň kemçilikleri, şol sanda artdyryp ýazmalar, idegsiz, suwsuz guradylýan nahallar barada maglumat bermeýär.
Özbegistanyň ekologiýa ministri Aziz Abduhakimow 5-nji iýulda parlament deputatlarynyň öňünde çykyş edip, “Ýaşyl mekan” taslamasynyň çägindäki işleri ýerine ýetirenleriň hakykatda ekilmedik 2 million düýp bag nahalyny artdyryp ýazandygyny we suwaryş mümkinçiligi bolmadyk ýerlerde 7,3 million düýp nahal oturdandygyny aýtdy.