Suw ýetmezçiligi we yssy sebäpli Gazagystanyň 6 etrabynda adatdan daşary ýagdaý girizildi. (Wideo)
Gazagystanyň Baýzak, Žambyl, Kordaý, Merken, T. Ryskulow we Talas etraplarynda, ekinlere suwuň ýetmezçiligi we oňaýsyz aşa yssy howa şertleri sebäpli, adatdan daşary ýagdaý girizildi. Bu barada Žambyl oblastynyň akimatynyň saýtynda habar berildi.
Habarda aýdylyşyna görä, häzirki wagtda tebigy betbagtçylyga uçran daýhanlaryň ýitgileriniň öwezini dolmak üçin, Gazagystanyň hökümetiniň adatdan daşary ýagdaýlar üçin saklaýan ätiýaçlyk fondundan, serişdeleri paýlamak meselesiniň çözülýändigi aýdylýar.
Şu ýyl ekinlere suwuň ýetmezligi we aşa yssy howa şertleriniň ýokary bolmagy sebäpli, hasylyň geçen ýyl bilen deňeşdirilende, 25-30 göterime çenli pes bolmagyna garaşylýar.
Gazagystanyň Žambyl oblastynyň 5 etrabynyň daýhanlary bu tomsunda suw ýetmezçiliginden ejir çekýärler. Ýakyp barýan yssyda suwuň ýoklugy sebäpli, ekinleriň bir bölegi gurady. Žambyl sebitine gelýän suwuň 80 göterimi Gyrgyzystandan gaýdýar. Şu ýyl bolsa Gazagystanda bolan maglumata görä, goňşy ýurduň howdanlaryndaky suwuň derejesi 10 esse azalypdyr.
Şu aýda Gyrgyzystanyň Gazagystanyň Žambyl oblastyna ekerançylyk suwlarynyň üpjünçiligini kesýändigi belli boldy. Ekologiýa ministrliginiň maglumatlaryna görä, munuň netijesinde sebitde oba hojalyk ekinleriniň hasylyna zyýan ýetmek howpy abanýar.
Awgust aýynda Talas derýasynyň basseýnindäki Kirow suw howdanynyň möçberi geçen ýylyň degişli döwri bilen deňeşdirilende, 144,8 million kub metr azalypdyr, öň 177,28 million kub metr eken.
Ekspertleriň bellemegine görä, Gazagystan Ýewraziýa kontinentiniň ýurtlaryna degişli bolup, olar esasan suw resurslarynyň ýetmezçiligini başdan geçirýärler. Gazagystanda suwuň sarp edilişiniň 65 göterimi oba hojalygynyň paýyna düşýär. Ýurtda akýan suwlaryň ýarysyna golaýy (44,9 kub kilometr) goňşy ýurtlaryň – Hytaýyň, Russiýanyň, Özbegistanyň, Gyrgyzystanyň territoriýasyndan gelýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.