Harby parada taýýarlanýan esgerleriň arasynda ýarawsyzlyk köpelýär
Türkmen goşuny Garaşsyzlygyň 32 ýyllyk baýramy mynasybetli dabaraly harby parada taýýarlanýar. Dabaraly ýörişlere çekilýän harbylaryň arasynda tapdan düşýän, syrkawlaýan esgerler köpelýär.
Şu günler Türkmenistanyň harby edaralarynyň, şol sanda Goranmak ministrliginiň harby okuw mekdepleriniň hem-de käbir gorag polklarynyň harby serkerdeleri we esgerleri Aşgabadyň etegindäki Bekrewe harby şäherçesinde harby parada taýýarlyk görýärler.
Dabaraly ýöriş mynasybetli Balkan welaýatynda ýerleşýän Balkanabat Gorag polkundan, Harby-Deňiz Güýçleriniň “Garşy” harby birikmesinden hem-de Türkmenbaşydaky Harby-deňiz institutyndan 1000 töweregi harby gullukçy bir aý töweregi mundan ozal paýtagta getirilipdir.
Azatlyk Radiosynyň habarçysynyň öwrenen maglumatlaryna görä, awgustyň yssy günlerinde bir aý töweregi wagt bäri dabaraly ýörişlere taýýarlanýan esgerleriň arasynda syrkawlaýan, tapdan düşýän harbylar köpelýär.
Türkmenistanyň günbatar sebitlerinde ýerleşýän harby edaralardan Aşgabada getirilip, parada gatnaşmaly edilen esgerleriň ep-esli bölegi gün urma, içgeçme ýaly saglyk meseleleriniň ýitileşmegi bilen Balkan welaýatyna ugradylypdyrlar we harby keselhanalara ýerleşdirilipdirler.
Dabaraly ýörişe çekilýän harbylaryň arasynda keselçiligiň artmagy harby ýolbaşçylary şowsuzlyga iteripdir.
Habarçymyzyň harby töwereklerdäki ygtybarly çeşmesiniň maglumatlaryna görä, esgerleriň arasynda saglyk meseleleriniň ýitileşmegi bilen baglylykda birnäçe harby serkerdelere Türkmenistanyň goranmak ministri tarapyndan “käýinç” yglan edilipdir.
“Garaşsyzlyk baýramy 27-nji oktýabrdan 27-nji sentýabra geçirildi. Şonuň üçin harby ýörişe taýýarlyk çäreleri awgust aýyna gabat gelýär. Dabaraly ýörişe gatnaşýan esgerler 45 gradus yssy howada, günüň aşagynda parada taýýarlanmaly boldular. Munuň netijesinde, bir topar saglyk problemalary ýüze çykýar. Günüň aşagyndaky taýýarlyklar adamlary kesel edýär” diýip, ýagdaýdan habarly harby çeşme Azatlyk Radiosynyň habarçysyna gürrüň berdi.
Habarçymyzyň öwrenen maglumatlaryna görä, sebit garnizonlaryndan getirilen harbylar Bekrewe Harby şäherçesinde çadyr gurup ýaşaýarlar.
“Esgerleriň ýaşaýyş şertleri agyr” diýip, ýagdaýdan habarly çeşme Azatlyk Radiosynyň habarçysyna gürrüň berdi.
Harby parada gatnaşýan ähli harbylar Bekrewe Harby şäherçesinde bolýarlar. Harby serkerdeler saglyk ýagdaýlary ýüze çykan halatynda öz harajatlarynyň hasabyna saglygyny bejertmeli bolýarlar.
Türkmenistan 27-nji sentýabrda Garaşsyzlyk gününiň 32-nji ýyl dönümini baýram edýär. Öňki ýyllarda garaşsyzlyk baýramy 27-nji oktýabrda bellenýärdi, ýöne 2017-nji ýylda bu sene duýdansyz we anyk sebäpleri jikme-jik aýan edilmezden 27-nji sentýabra geçirildi.
Türkmenistanyň hökümeti maý aýynda Garaşsyzlyk baýramyna taýýarlyk işleri boýunça ýörite toparyň düzümini tassyklady. Medeniýet ministrliginiň edaralary, welaýatlaryň hem-de Aşgabat we Arkadag şäherleriniň häkimlikleri baýramçylyk çäreleriniň meýilnamasyny taýýarlap, Ministrler kabinetine tabşyrmaga borçly edildi.
Bu aralykda, Garaşsyzlyk baýramyna gabatlap, sentýabr aýynyň ahyrky hepdesinde Türkmenistanyň Halk maslahatynyň mejlisi hem geçirilýär.
Galyberse-de, baýramçylyk dabaralary, möhüm syýasy-jemgyýetçilik çäresi bolan halk mejlisi bilen bir hatarda 22-nji sentýabrda Türkmenistanyň prezidenti Serdar Berdimuhamedow 42 ýaşaýar. Berdimuhamedowlaryň şahsyýet kulty dabaralandyrylýan ýurtda döwlet ýolbaşçylarynyň doglan günleri köplenç dabaraly bellenip geçilýär.
Häkimiýetler üçin şeýle möhüm seneleriň öňüsyrasynda, hususan-da paýtagt Aşgabatda awgustyň ahyrky hepdelerinde köpçülikleýin baýramçylyk çärelerine taýýarlyk işleri bat aldy. Medeniýet we sungat işgärleri baýramçylyk repetisýalaryny batlandyrdy. Şol bir wagtda, paýtagtda wagtlaýyn ýaşaýan we işleýän sebit ýaşaýjylary, içerki migrantlar köpçülikleýin öz ýaşaýan sebitlerine ugradylyp başlandy.
Azatlyk Radiosynyň habarçylary ýaňy-ýakynda paýtagtyň çäginde ýerleşýän ähli ýokary okuw jaýlarynyň talyplaryny 27-nji sentýabrda geçiriljek baýramçylyk çärelerine çekmegiň göz öňünde tutulýandygyny habar berdiler.
Türkmenistanyň döwlet media serişdeleri köpçülikleýin mejbury çäreler barada habar bermeýärler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.