Türkmenabatly telekeçilere Zegär bazarynda 4 ýyl öň satyn alan ýerleri eýeterli däl
Türkmenabatda täze gurlan uly bazarlaryň biri henizem ulanylmaýar. Zergär etrapçasyndaky bu bazaryň gurluşygy 2019-njy ýylda başlanyp, oňa ýerli telekeçileriň onlarçasy pul ýatyrmaga mejbur edilipdi. Azatlygyň ýerli habarçylary gurlup taýýar bolan bu bazaryň henizem işlemän durmagy we munuň telekeçilere ýetirýän täsiri barada habar berýärler.
Habarçymyz Zergär etrapçasyndaky bazarynyň doly taýyn bolandygyny we muňa birnäçe ýyl bari garaşýan telekeçileriň satyn alan ýerlerinden peýdalanmak isleýändigini aýdýar.
"Bazar daly taýýar. Emma dükanlar gulply, hiç hili söwda edilmeýär. Häkimlik bazary ulanmaga bermeýär. Häzir eýýäm 2023-nji ýyl we adamlar birnäçe ýyl ozan öz puluna gurlan bazary ulanmaga garaşýarlar" diýip, habarçymyz aýdýar.
Telekeçiler bazaryň 2019-njy ýylda düýbi tutulan döwründe häkimiýetleriň onuň gurluşygyny bir ýylda tamamlamagy talap edendigini we telekeçilerden pul ýygnandygyny, soňky iki ýylda bolsa bazaryň tas taýyn görnüşde işlemän durandygyny gürrüň berdiler.
Bazaryň näme sebäpden ulanylyşa berilmeýändigini häkimiýetleriň aýtmaýandygyny habarçylar belleýärler. Azatlyk Radidosy bilen gürrüňdeş bolan telekeçileriň ençemesi bazaryň ýapyk durmagynyň sebäplerini bilmek üçin häkimlige ýüz tutandygyny, emma jogaba derek özlerine haýbat atylandygyny aýdýarlar.
"Bazarda dükan gurmak üçin ýer satyn alan sowdagärler ýakynda şäher häkimligine arza ýazyp bardylar. Häkimlikdäki ýolbaşçylar olary toplap, 'siz şu wagt munça puly nireden tapdynyz, nädip bu dükanlary gurdyňyz. Hany gurluşyk harytlarynyň hasaplary, haýsy kerpiç zawodundan kerpiç aldyňyz' diýip, olara haýbat atyp, arzasyny kanagatlandyrmandyr" diýip, habarçymyz gürrüň berýär.
Azatlyk Radiosynyň Zergär bazary barada Türkmenabadyň häkimliginden resmi maglumat almak synanyşygy başa barmady.
Habarçymyz bilen söhbetdeş bolan telekeçiler bazaryň gurluşygy we häkimiýetleriň telekeçileriň öňünde goýan şol wagtyky şertleri barada şeýle gürrüň berdiler.
"Türkmenabadyň şäher häkimligi Zergär etrapçasynda uly gonamçylyň golaýynda Uly bazary gurmak uçin 10 gektar ýer meýdanyny bölüp berende onuň gurluşygyna dowletden hiç hili puluň berilmändigi aýdypdy we bazarda dukanlary gurmak uçin adamlara ýer bölüp beripdi. Bazaryň içinde dukanlary gurjak adamlaryň eline taslama hem berip, her dükana 40 inedördül metr ýer üçin 25 müň manatdan pul ýygnapdy" diýip, anonim gürleşen telekeçileriň biri gürrüň berdi.
Telekeçiler bir dükanyň gurluşygyna 150 müň manada barabar çykdajy edilendigini aýdýarlar. "150 müň dukana, onuň ýerine 25 müň manatdan çykdajy edildi. Sowdagärleriň her biri ýer üçin 25 müň manatdan döwlete geçirdi" diýip, türkmenabatly telekeçi gürrüň berdi.
Şeýle-de, olaryň sözlerine görä, Zergär etrapçasyndaky bazaryň çetde ýerleşýändigi sebäpli telekeçiler ondan ýer satyn almaga başda uly höwes beldirmändir, emma soňra bu ýerler Türkmenabatda ýykylan beýleki bazarlarda, şol sanda “Bahar” etrapçasyndaky “66 bazar” atlandyrylýan bazarda işlän telkeçilere teklip edilipdir.
Türkmenistanda soňky ýyllarda köne bazarlaryň ençemesi ýykylyp, käbirleri birnäçe gezek gaýtadan guruldy. Täzeleri hem döredildi. Emma bazarlarda söwda edýän telekeçiler öz işinde durnuklylygyň ýokdugyny, telekeçiler üçin şertleriň köplenç amatsyzdygyny, häkimiýetleriň talaplarynyň üýtgäp durýandygyny we hatda bazarlaryň duýdansyz we düşündirişsiz ýapylyp bilýändigini aýdýarlar.
Azatlygyň habarçylary telekeçileriň çekýän zyýany we çykgynsyzlykdan öz nägileligini açyk görkezip protest bildirmäge mejbur bolandygy barada ençeme gezek habar beripdi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.