Ysraýyl Gaza zolagynda Hamasa garşy söweşýändigini aýdýar
Görnüşinden Ysraýyl Gaza zolagynyň günorta sebitlerinde gury-ýer operasiýasyna girişdi. Ysraýylyň zarbalary netijesinde onlarça palestinaly heläk boldy we ýaralandy.
Täzeden başladylan söweş hereketleri Ysraýylyň güýçleri bilen Hamasyň arasynda gelnen ýedi günlük ok atyşyklar boýunça arakesmäniň 1-nji dekabrda tamamlanmagyndan soň döredi.
Arakesmäniň çäginde, Hamasyň saklaýan, aglaba ysraýyllylardan ybarat 105 zamun 240 sany palestin tussagy bilen çalşyldy.
Şol bir wagtda, täzeden başladylan söweş hereketleri zamunlykdaky beýleki tussaglaryň kadaly azatlyga çykyp biljekdigi baradaky umytlara kölege saldy. Käbir maglumatlara görä, ýene-de 130 töweregi adam zamunlykda saklanýar.
Britaniýanyň harbylary Hamasyň 7-nji oktýabrdaky hüüjminden soň zamun alnan adamlary ýüze çykarmaga hemaýat etmek üçin, Gazanyň üstünde gözegçilik uçuşlaryny amala aşyrjakdygyny mälim etdi. Bu soňky özgerişi Britaniýanyň Goranmak ministrligi tassyklady.
Britaniýa 7-nji oktýabrdaky hüjümde azyndan 12 britan raýatynyň öldürilendigini we bäşisiniň entegem dereksiz ýitendigini aýtdy.
Bu aralykda, Halkara Jenaýat sudunyň baş prokurory Karim Han Gazadaky urşunda ähli taraplaryň mümkin uruş jenaýatlarynyň derňelmeginiň tarapynda çykyş edýändigini aýtdy.
“Biz kanunyň ol ýerde, front liniýasynda bardygyny we onuň ähli kişini goramaga ukyplydygyny görkezmelidiris” diýip, Khan Halkara Jenaýat sudunyň 3-nji dekabrda ýaýradan beýanatynda belledi.
Khan soňky günleriň dowamynda Ysraýyla we Palestin territoriýalaryna sapar etdi. Ol Hamasyň hüjümleriniň pidalarynyň ýakynlary we dostlary tarapyndan çagyryldy.