Russiýada romaly aýalyň pyçaklanmagy sebäpli turan gozgalaňdan soň onlarça adam tussag edildi
Bu bidüzgünçilik taksi sürüjisi bolup işleýän ýerli aýal pyçaklanyp öldürileninden soň başlandy. Merhumyň jesedi öz awtoulagynyň içinden tapyldy.
Korkinonyň ýaşaýjylary roma, ýagny sygan diasporasynyň agzalaryna degişli diýip bilinýän bir jaýyň golaýyna ýygnandylar we bu jenaýatda iki sany myhmanyň günäkärdigini aýtdylar.
Ýerli telegram kanallarynyň we şaýatlaryň habar bermegine görä, olar bu jaýy daşladylar we Molotow kokteýllerine tutdular.
Wakanyň bolan ýerine ýörite güýçler geldi we binanyň daşyny gabap, gaharly mähelläni bu ýerden kowup çykardy.
Şondan soň adamlar şäheriň beýleki ýerlerine ýaýradylar we syganlara degişli diýip bilinýän jaýlaryň ýene ikisine, birnäçe maşyna ot berdiler.
Çelýabinsk sebitiniň Adatdan daşary ýagdaýlar ministrligi ýangynlaryň bölümiň işgärleri tarapyndan derrew söndürilendigini habar berdi.
Sebit häkimi Alekseý Teksler öz iki orunbasarynyň we Rus Gwardiýasynyň ýörite güýçleriniň bölümleriniň Korkino şäherine gidendigini aýtdy.
Ol ölen aýalyň maşgalasyna "kömek we goldaw" wadasyny berdi.
Ýerli “74.ru” neşiri roma diasporasynyň wekilleriniň goňşy Ýemanželinsk şäherine gidýändigini we azyndan 30 adamyň Korkino polisiýa bölümine äkidilendigini habar berdi.
Ýerli ýaşaýjylar tussag edilenleri goldamak üçin polisiýa bölümine hem barýarlar.
Habarlaryň birinde bu ganhorlyk bilen bagly 17 ýaşly bir ýigidiň tussag edilendigi aýdylýar.
Güman edilýän adam, aýdylmagyna görä, dawa ýüze çykan mahaly pida bolanyň awtoulagynda oturan ýolagçy bolup, ony döşünden azyndan dört gezek pyçaklapdyr.
Derňew komitetiniň sebit bölümi ol ýetginjegiň bu jenaýata bolan gatnaşygynyň entek tassyklanmandygyny aýtdy.