Litwada ýitirim bolan dört amerikan esgeriniň üçüsi öli tapyldy
Litwada harby türgenleşikler mahaly ýitirim bolan dört amerikan esgeriniň üçüsi öli tapyldy. Dördünji harby gullukçynyň gözlegleri dowam edýär. Bu barada Birleşen Ştatlaryň ýaragly güýçleriniň Ýewropadaky we Afrikadaky serkerdeligi mälim etdi.
Beýanatda Litwanyň ABŞ-nyň ygrarly ýaranydygy bellenilýär, şeýle-de ýiten esgerleri gözlemek işleri üçin litwaly we polşaly harbylara minnetdarlyk bildirilýär. Harby gullukçylar dikuçarlar, dronlar we gury ýer güýçleri arkaly gözlendi.
“M88 Herkules” sowutly ulagy Litwanyň Belarus bilen serhediniň golaýyndaky Pabrade harby tälim meýdançasynda başlanan halas ediş operasiýasyndan alty gün soň, 31-nji martda, irden tapyldy.
Soňundan harby ulagyň kesgitlenen ýoldan çykyp, kartalarda görkezilmedik bir batgalykda gark bolandygy anyklandy. NATO-nyň baş sekretary Mark Rýutte Warşawa eden saparynyň dowamynda, ekipažyň heläk bolandygyny mälim etdi; emma mundan öň amerikan serkerdeligi ýitirim bolan harbylaryň ykbaly barada resmi taýdan hiç zat aýtmandy.
Pabrade poligony Litwa bilen Belarusyň serhedinden birnäçe kilometr uzaklykda ýerleşýär. Ýitirim bolan esgerler meýilleşdirilen taktiki taýýarlygy geçýärdiler.