Ysraýyl zamunlaryň boşadylmagynyň öwezine, ok atyşlygy uzak möhletli bes etmegi teklip etdi
Ysraýyl, ABŞ we Ýewropa Bileleşigi tarapyndan terrorçy gurama hökmünde ykrar edilýän Hamas radikal topary tarapyndan saklanylýan zamunlaryň ýarsyndan gowragynyň goýberilmeginiň öwezine, Gaza zolagynda ok atyşyklary bes etmek boýunça uzak möhletli režimi girizmegi teklip etdi. Bu barada Reuters gullugy atlandyrylmasyzlygyny soran ysraýyl resmilerine salgylanyp habar berýär.
Şol bir wagtda, Ysraýlyň armiýasy Gazanyň ilatynyň ewakuasiýa edilmegi boýunça täze görkezmeleri berdi we zolagyň gündogarynda meýilleşdirilýän “intensiw operasiýalar” barada mälim etdi.
Reuters gullugynyň maglumatyna görä, 40-50 gün dowam etjek ok atyşyklary bes etmek režiminiň dowamynda, Ysraýylyň maglumaty boýunça diridigi öýdülýän 24 zamunyň ýarysy boşadylar we eýýäm heläk bolandygy çaklanylýan 35 adamyň ýarysyndan gowragynyň jesedi gowşurylar.
30-njy martda Ysraýylyň premýer-ministri Benýamin Netanýahu öz ýurdunyň Hamasa basyşyny güýçlendirjekdigini, şol bir wagtda zamunlary boşatmak boýunça gepleşikleri dowam etdirmäge meýillidigini aýtdy.