Eýran Trampyň “bombalamak” haýbatyndan soň, berk gaýtawulyň beriljekdigini aýdýar
Eýranyň ýokary ruhany lideri Aýatolla Ali Hameneýi ABŞ-nyň prezidenti Donald Trampyň eger-de Tähran ýadro programmasy boýunça gepleşikleri geçirmekden ýüz öwürse, onda “bombalamalaryň boljakdygy” baradaky duýduryşyna jogap edip, muňa “berk” gaýtawulyň beriljekdigini aýtdy. Bu iki ýurduň arasyndaky barha ýitileşýän ritorika boýunça artýan aladalara gabat geldi.
Tramp Eýrana täze sanksiýalardan we nyrhlardan başlap, harby herekete çenli çäre görmek haýbatyny atdy. Hameneýi 31-nji martda Eid Al-Fitr dabarasy boýunça geçirilen üýşmeleňiň dowamynda, Birleşen Ştatlar tarapyndan amala aşyrylan islendik hüjüme “berk garşylygyň beriljekdigini” aýtdy.
Şol bir wagtda, eýran lideri “daşardan hiç hili erbetlige garaşmaýandygyny” hem sözüne goşdy.
Tramp Ak tama dolanandan soň, onuň administrasiýasy Eýranyň ýadro ýaragyny edinmeginiň öňüniň alynmalydygyny gaýta-gaýta aýtdylar. Şeýle-de, eger Tähran Trampyň tekliplerini ret etse, bu ýagdaýda harby hereketlere hem garalýandygyny duýdurdylar.
Eýran özüniň ýadro programmasynyň parahatçylykly maksatlara gönükdirilendigini öňe sürüp gelýär, şol bir wagtda-da eýranly resmiler, ABŞ bilen dartgynlylyklaryň artmagy bilen, ony ýarag önümçiligine gönükdirip biljekdikleri bilen hem haýbat atýarlar.