Qırım Yuqar Radasınıñ beş sabıq deputatı devletke hainlik yapqanlarından şübheli – QMC prokuraturası
Qırım Muhtar Cumhuriyeti prokuraturası, Qırım Yuqarı Radasınıñ beş sabıq deputatına, devletke hainlik yapqanlarından şübhe altında bulunğanlarını bildirdi. Bunı dekabrniñ 18-nde muessiseniñ matbuat hizmeti bildirdi.
Bidirüvde: «Olarnıñ vastasız iştiraki ile bir sıra qanunsız qararlar alınıp, bu qararlarnıñ alınması neticesinde muhtariyetniñ territoriyası Rusiye Federatsiyası tarafından işğal etildi», – denile.
Muessisede deputatlarınıñ adlarını bildirmediler.
Bir kün evel Qırım Muhtar Cumhuriyeti prokuraturası, 2017 senesiniñ dekabr ayındaki vaziyetine köre, Qırım Yuqarı Radasınıñ 75 sabıq deputatınıñ qıdırıluvı ilân etildi, dep bildirdi.
Qırım ve Aqyar şeeri territoriyasında 2014 senesi martnıñ 16-sında yarımadanıñ statusı boyunca dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.