Aqmescit akimiyeti ekstremizmni «aqlanğan vatandaşlarnıñ toplu surette yaşağan yerleri»nde qıdıra
Rusiyeniñ kontroli altında bulunğan Aqmescit akimiyeti, toplu surette yaşama yerlerinde «aqlanğan vatandaşlarğa devlet tarafından qol tutuv ve ekstremizm ideologiyasına qarşılıq kösterüv»ge dair añlatma işini alıp barğan iş grubunı meydanğa ketirdi.
Şeer memuriyeti yanındaki matbuat hizmetiniñ bildirgenine köre, mahsus iş grubunıñ birinci körüşüvi şeerniñ qırımtatarlar toplu surette yaşağan Aq-Meçet mikrorayonında keçti.
Körüşüv şeer memuriyetiniñ milletlerara munasebetler boyunca bölüginiñ rehberi Emil Mamediyev, memuriyetteki munasip bölükleriniñ hadimleri ve cemiyet vekillerinin iştiraki ile muessiseniñ yolbaşçısı İsmet Ablayevnıñ rehberligi altında keçti.
Bildirüvde: «Rusiyeniñ 2025 yılına qadar muddetke milletlerge dair devlet siyaseti, aqlanğan vatandaşlarğa içtimaiy qol tutuv ve ekstremizm ideologiyasına qarşılıq kösterüv strategiyası»nıñ ömürge keçirilüvi, müzakerelerniñ mevzusı oldı», – denile.
Aynı zamanda mikrorayon sakinleri yol qaplamasınıñ qanaatlendirmegen vaziyette olğanına, kanalizatsiya ve yarıqlandıruvnıñ olmağanına şikâyet ettiler.
Öz nevbette İsmet Ablayev, yaqın vaqıtta mikrorayonnıñ abadanlaştırılacağını vade etip, bu işniñ endi başlağanını söyledi.
Matbuat hizmetiniñ bildirgenine köre, «Rusiyeniñ milletlerge dair devlet siyaseti, aqlanğan vatandaşlarğa içtimaiy qol tutuv ve ekstremizm ideologiyasına qarşılıq kösterüv strategiyası»nıñ ömürge keçirilmesi ile alâqalı meseleler aqqında haberdar etüv ve olarnı añlatuv boyunca» iş grubu, şeerde problemli meselelerni qıdırıp tapmaq ve çezmek içün meydanğa ketirildi.