Qırımda 30 biñ qadar Rusiye arbiyi yerleştirilgen – ekspert
İlhaq etilgen Qırımda yerleştirilgen Rusiye arbiyleriniñ sayısı 30 biñ qadar kişini teşkil ete. Bunı Qırım.Aqiqat Radiosı içün bergen intervyüde arbiy ekspert, Ukraina Silâlı quvetleri ştabınıñ sabıq spikeri Vladislav Seleznöv söyledi.
Onıñ aytqanına köre, daa doğru raqamlarnı söylemek mumkün degil, «çünki olar keşfiyat harakterine malikler». Ondan ğayrı, Seleznövniñ aytqanına köre, Rusiye yarımadanıñ territoriyasında faal surette zemaneviy silâlarnı yerleştire.
«Bu em Ava mudafaası vastaları ve şu cümleden S-400 «Triumf» kompleksi, em raketalarnen silâlana bilgen zemaneviy fregatlar, em «Kalibr» kompleksi, uçaqlar ve ağır tehnika. Rusiye 2014 senesiniñ fevralinde Qırımnı işğal etken soñ yalıñız o anda mevcut olğan arbiy şeerçiklerni degil, aynı zamanda daa evel terk etilip yerli akimiyetlerniñ balansına berilgen arbiy şeerçiklerni de ğayrıdan qurmağa ve arbiy hadimler, silâlar ve tehnikanen toldurmağa başladı», – dedi Seleznöv.
Bu hususta daa tafsilâtlı malümat – yaqın künlerde Qırım.Aqiqat saytında derc etilecek intervyüdedir.
2018 senesinde Aqyardaki Fiolent burnunda S-400 «Triumf» ava mudafaası zenit-raketa kompleksleri arbiy nevbetke turdı.
2014 senesinde Qırım ilhaq etilgen soñ Rusiye yarımadada muntazam surette arbiy talimlerni ötkere. Ukrainanıñ Baş ştabında, Rusiyeniñ Qırımdaki areketlerine qanunsız deyler.