Qırımda ğayıp olğan Şaymardanov ihtimal ile Ukraina içün keşfiyat malümatını toplay edi – aq-uquq qorçalayıcısı

İlhaq etilgen Qırımda habersiz ğayıp olğan Timur Şaymardanov ihtimal ile Ukraina içün razvedka malümatını toplay edi. Bu versiyanı Qırım.Aqiqatnıñ tele leyhası jurnalistlerinen İnsan aqları içün media teşebbüsiniñ tahqiq eticisi Olga Reşetilova paylaştı.

Reşetilova: «Timur özü Rusiye arbiylerini satın ala ve bu yolnen malümat toplay edi. O, özü bu satın aluv içün para tapa ve bu malümatnı qıtağa yollay edi. Ğayıp olmasından qararnen bir afta evel o, keşfiyatçılardan birine, Kyivge malümat yollamaq içün işançlı bir kanalnen temin etilmesini rica etti. Lâkin Timurnıñ qolunda olğan bu büyük bir malümat massivini öyle de yollap yetiştirmediler. Timur ğayıp oldı», – dey.

Aynı vaqıtta aq-uquq qorçalayıcıları, Şaymardanovnıñ qaytmasına umüt etip, havfsızlığını temin etmek maqsadınen menbalarını bildirmeyler.

Bu malümatnı tasdiqlağan diger deliller yoq.

2014 senesi mayısnıñ soñunda Aqmescitte, yarımadağanıñ arbiy işğaline  qarşı narazılıqlarnıñ faal iştirakçileri Timur Şaymardanov ve Seyran Zindedinov habersiz ğayıp oldılar. Olarnıñ ğayıp olmaları vaqiası boyunca em Qırımda, em Ukrainanıñ qıtadaki qısmında cinaiy işler açıldı. Lâkin şimdilik tahqiqat iç bir netice bermedi.

Qırımnıñ ilhaqından soñ Qırımda esas olaraq qırımtatarlar arasından adamlarnıñ ğayıp oluv adiseleri sıqlaştı. Aynı zamanda Rusiyeniñ kontroli altında olğan Qırım Tahqiqat komitetinde, yarımadada «qırımtatarlar kütleviy surette ğayıp olmay», dep iddia eteler.

Qırım aq-uquq qorçalayıcıları gruppası, alıp qaçuvlar Rusiye ukümeti ya da olnıñ kontroli altında olğan paramilitar gruppalar tarafından yapılğanını zan ete. Qırım ukümeti de-facto ğayıp oluv adiselerini tanıy, lâkin buña alâqası olğanını inkâr ete.