Torontoda, Baluhnıñ meselesi muzakere etilecek «Yediler gruppası» TİN başlıqlarınıñ körüşüvi başlandı

Kanadadaki Toronto şeerinde «Yediler gruppası» tış işleri nazirleriniñ körüşüvi başlandı. Ukraina tış işleri naziri Pavlo Klimkin onda ilhaq etilgen Qırımda mahküm etilgen ukrain faaliyetçisi Volodımır Baluhnıñ açlıq meselesini ortağa qoymaq istey.

Azatlıq Radiosınıñ bildirgenine köre, diplomatlarnıñ sammitindeki birinci tedbir – Ukraina ve Rusiye aqqında suhbet – Kanada diplomatiyasınıñ rehberi Hristâ Frilandnıñ evinde ğayrı-resmiy şekilde keçe. O, şahsen saba yemegini azırladı ve zenaatdaş nazirlerni öz aşhanesinde qabul ete.

Ğayrı-resmiy sabalıq yemek bir buçuq saat devam etecek.

Ukraina tış işleri naziriniñ bu körüşüvniñ arfesinde pressağa bildirgenine köre, o, Qırım sakini Volodımır Baluhnıñ taqdiri, Rusiye tarafından ilhaq etilgen Ukrainanıñ territoriyaları meselelerinde Ukraina ile birdemligini, Donbasstaki barıştırıcı missiyasınıñ formatı, Ukrainanıñ reformaları, Angliyadaki Solsberi şeerinde sabıq Rusiye istihbarat hadimi Sergey Skripalniñ zeerlenmesi ve Suriyedeki himiyeviy ucümden soñki yañı şaraitlerde Kyivniñ ğayretlerini «Yediler gruppası» devletlerinen koordinatsiya etüvini muzakere etmege planlaştıra.

Pavlo Klimkin, AQŞ devlet kâtibi vazifesini eda etken Con Sallivan ve Almaniya tış işleri naziri Gayko Maas ile eki taraflı körüşüvlerini endi keçirdi. Ondan ğayrı, aprel 22-de onda Britaniya diplomatiyasınıñ başlığı Boris Conson ile körüşüvi planlaştırılğan.

Daa evel Kanadadaki Ukraina elçisi Andrey Şevçenko, Kanadadaki Toronto şeerinde aprel 22-de başlaycaq «Yediler gruppası» devletleri tış işleri nazirleriniñ körüşüvine Ukrainanı birinci kere davet ettiler, dep bildirdi.

O, Ukraina tış işleri naziri Pavlo Klimkin davetnameni öz zenaatdaşı, Kanadanıñ baş naziri Hristâ Frilanddan alğanını qayd etti.

«Yediler gruppası»na AQŞ, Yaponiya, Almaniya, Kanada, İtaliya, Fransa ve Büyük Britaniya kireler. 2018 senesinde klubda Kanada reislik yapa.