Qırım kirişinde Rusiye uquq qoruyıcıları qırımtatar faalini tuttı – Çubarov
İşğal etilgen Qırımnıñ Çonğar keçiş noqtasında dekabrniñ 12-nde Ukraina vatandaşı, qırımtatar faali Edem Bekirov tutuldı, dep bildire Qırımtatar Milliy Meclisiniñ reisi, Ukraina halq deputatı Refat Çubarov.
«Edem saba saat 08:30-da Rusiye kontrol etken yerde pasport kontrolinden keçkende tutuldı. Saat 14:40-ta Rusiye uquq qoruyıcıları Bekirovnı memuriy sıñırdaki Çonğan keçiş noqtasından yarımadağa alıp ketti. Şaatlarnıñ aytqanına köre, Edem Bekirovnı maşinağa oturtqanda Rusiye uquq qoruyıcıları Canköy şeeri aqqında ayta edi, lâkin Edem Bekirovnıñ bulunğan yeri şimdilik belli degil. Edemniñ telefonı çalışmay», – dep yazdı Çubarov Facebook saifesinde.
Siyasetçiniñ aytqanına köre, 1961 senesi doğma Edem Bekirov Herson vilâyetindeki Novoalekseyevka qasabasınıñ sakinidir. O, 78 yaşında anasını ve aqrabalarını ziyaret etmek içün Qırımğa ketti.
«Edem Bekirov Novoalekseyevka qasabasınıñ qırımtatar cemaat faallerinden biridir. 2018 senesi yanvar ayında yürekten ameliyat oldı, oña 4 suniy damar qoyulğan edi. Bundan ğayrı, Edem Bekirov sağ ayağında (tiz aşağı) protez taşıy. Al-azırda Edem Bekirov aqqında başqa bir malümat yoq», – dedi Çubarov.
Al-azırda Rusiye uquq qoruyıcıları tarafından bunı isbatlaycaq bir malümat ve Ukraina tarafınıñ cevabı yoq. Qırım.Aqiqat adiseniñ tafsilâtlarını ögrene.
Noyabrniñ 15-nde qırımtatar faali Zair Smedlâyev bildirdi ki, Qırım ve esas Ukraina arasındaki memuriy sıñırda Rusiye uquq qoruyıcıları qırımtatar faalleri Lenora Dülber ve Nariman celâl, Qurultay delegatı Lemmar Yunusov ve Qurultaynıñ sabıq delegatı Mustafa Asabanı tutıp aldı. Birazdan Dülber yiberildi.
Rusiye uquq qoruyıcıları bunı izaatlamadı. Bir qaç saattan soñ faaller çıqarılıp yiberildi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».