ABDde qırımtatar sürgünliginiñ qurbanları hatırasına sergi açıldı

New Yorktaki (ABD) Ukrain müzeyinde 1944 senesiniñ facialı adiseleri şaatlarınıñ fotoresimlerinen «75 yıldan soñ sürgünlik qırımtatarlarnıñ sımalarında» sergisi açıldı. 

«Bir ğayem peyda oldı, bu zor tarihnı, sürgünlikni insanlarnıñ fotosüretleri vastasınen tarif etmek eñ doğru yol olur dedim», – dep ayttı ğaye müellifi, «Ukrayınska pravda» haber resursınıñ baş muarriri Sevgil Musayeva, dep haber ete «Ukrinform» ukrain haber agentligi. 

Onıñ aytqanına köre, sergi teşkil etmek ğayesi çetelde insanlar qırımtatar halqınıñ tarihı aqqında pek az bilgenini añlağanda peyda oldı. 

«Bugün kelgenler balalıqta sürgünlikni körgen on insannıñ süretini köre bile… Bu ikâyelerni unutmamaq müim. Bunı körgen, eşitken, qapuları qaqılğan insanlar Qırımdan uzaqlaştırğan yolnı hatırlaylar», – dep qayd etti Musayeva. 

Sürgünlik şaatlarınıñ fotosüretlerini 2019 senesi mart ayında yarımadağa barğan qırımtatar fotografı Zarema Yalıboylu çıqardı.

«Bu maqsadnen Qırımğa bardı, eki afta foto çıqardı. Onıñ ziyareti yañı qırımtatarlarnı apiske aluv dalğasına rastkeldi… Em qartlar, em gençler pek qasevetlene. Bu fotosüretlerde, bu közlerde bile qasevet, keder, acı körmeñiz mümkün», – dedi Musayeva.

Onıñ aytqanına köre, sergi sentâbr ayına qadar devam etecek, soñra onı Kanada ve Ukrainanıñ paytahtı Kyivde köstermege planlaştırıla.

Musayevanıñ aytqanına köre, Rusiyeniñ Qırım işğalinden soñraki beş yılnıñ adise-vaqiaları qırımtatarlarnı ve ukrainlerni yaqınlaştırdı, halqlarnıñ biri-birinen bağlı eski peşin fikirleriniñ yoq etilmesine yardım etti. 

«Qırımtatarlar Qırımdan ketmege mecbur. Gençler ve Meclis azalarına qarşı basqı, siyasiy repressiyalardan sebep… Kederli bir şey. 75-inci yıllıq arfesinde qırımtatarlarnıñ facialı tarihı, ne yazıq ki, tekrarlanğanını tüşünemiz», – dep ayttı jurnalist.

Mayısnıñ 18-nde Ukraina ve dünyada qırımtatar halqınıñ 1944 senesi Qırımdan sürgün etilüviniñ qurbanları añılmaqta. Şu künü qırımtatarlar tolu birinci eşelon yarımadadan Orta Asiyağa yollanğan edi. Umumen 180 biñ kişi sürgün etildi.

Şu künü qırımtatar sürgünliginiñ qurbanlarını añma tedbirleri keçirile.

Ukraina Yuqarı Radasınıñ qararına köre, mayısnıñ 18-i Qırımtatar halqınıñ genotsid qurbanlarını añma künü olaraq ilân etildi.