Rusiye mahkemesi FSB hadimini Bağçasaraydaki «Hizb ut-Tahrir davası» boyunca sorğuğa çekti

Rusiyeniñ Rostov-na-Donudaki Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davası» boyunca birinci qabaat şaatınıñ sorğusını yekünledi, dep haber ete Qırım.Aqiqat mühbiri.

Qararı cinaiy dava açılması içün sebep olğan FSB operativ hadimi Nikolay Artıkbayevniñ sorğusı 12 oturışuv boyunca devam etti.

«Bugün Artıkbayevniñ sorğusı yekünlendi, mahkeme bir çoq sualni çıqarsa da, bu şaatnıñ sorğusını bitirip oldıq, qalğan suallerni berdik. Bu basamaqta prokuror mahkeme oturışuvınıñ nizamını deñiştirmege rica etip, bugün müvekkilerimizniñ hasiyetnamelerini oqup başladı. Prokuror Rusiye pasportları aqqında soradı, müvekkillerimiz turmuş meselelerini al etmek içün, hastahanege barmağa ve ilâhre imkân olsun dep, pasportlarnı almağa mecbur ediler, dep cevap bergenler», – dep tarif etti advokat Ayder Azamatov.

Advokatnıñ aytqanına köre, mahkeme daa 30-ğa yaqın şaatnı sorğuğa çekmeli.

«Mahkeme şaatlarnıñ kelmesini temin etip olsa, yarın qalğan şaatlarnıñ sorğusına başlamağa imkânımız olur, olarnıñ sayısı 30 kişige yaqın, ve daa üç şaatnıñ taqma adı bar, olar gizli şaat ola», – dep qoştı Azamatov.

Noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.

2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.

«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.