Rusiye prokuraturası Mustafa Cemilevniñ qız qardaşını tenbiledi
Bu aqta Seytveliyeva Qırım.Aqiqatqa tarif etti.
«Meclis tarafdarları fevralniñ 23-nden 26-na qadar Bağçasaray rayonında cumhuriyetniñ vaziyetini kerginleştirecek ekstremist aktsiyalarını, Qırımnıñ birinci müftisi N.Çelebicihannıñ ölüm yılına bağışlanğan ekstremist ve milletçilik timsalleri qullanılacaq kütleviy qanunsız tedbirlerni, «Rusiye işğaline qarşı qırımtatar tirenüv kününi» azırlay», – dep aytıla Qırım.Aqiqat muarririyetiniñ elinde olğan vesiqa metninde.
Rusiye prokuraturası, Dilâra Seytveliyeva «bu kütleviy tedbirlerniñ iştirakçisi (teşkilâtçısı) ola», dep israr ete.
Tenbi vesiqasında talaplar yerine ketirilmese, mesüliyetke çekilecegi aytıla.
«Sıq-sıq Kyivge barmağa mecburım. Amma bu sefer kelgende istidatlı yaş şaireler Seyyare Kökçe ve Mayye Safetnen körüşüv yaptıq, bir qaç on semetdeş dostumız toplaştı. Belki, bunı qabul etilmeycek faallik dep sayalar. Bunıñ kibi «tenbiler» ilk sefer kelmegen daa bir insannı bilem», – dep tarif etti Dilâra Seytveliyeva.
Qırım.Aqiqat, Qırımtatar Milliy Meclisiniñ reisi Refat Çubarov ve qırımtatarlarnıñ lideri Mustafa Cemilevden izaat bermelerini istedi.
Ukrainada fevralniñ 26-nda cemaatçılıq teklif etken «Qırımnıñ Rusiye işğaline qarşı tirenüv künü» qayd etile. 2014 senesi bu künü Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçti. Miting iştirakçilerine qarşı Rusiye tarafdarları, hususan «Rus birligi» firqasınıñ faalleri çıqqan edi.