Freedom House: işğal etilgen Qırımda 300-den çoq jurnalist taqibi qayd etildi
Aq qorçalayıcılar Qırımnıñ Rusiye işğaliniñ altı yılı devamında Rusiye akimiyeti ve quvet müessiseleri tarafından jurnalist ve blogerlerniñ 300-den çoq taqibini qayd etti. Bu aqta ZMINA insan aqları merkezi ve Qırım aq qorçalayıcı gruppası azırlağan Qırımda söz serbestligini bozuv esabatında aytıla, dep haber ete Freedom House halqara aq qorçalayıcı teşkilâtı Facebookta.
Derc etilgen malümatqa köre, işğal vaqtında qayd etilgenler:
jurnalist ve blogerlerge qarşı 11 cinaiy ve 13 memuriy dava
23 ücüm
20 tintüv
8 işkence
47 tutuv
Hatırlatamız, Freedom House halqara aq qorçalayıcı teşkilâtı qırımlı jurnalist Mıkola Semenanıñ azat etilüvine cevap berip, Rusiyeni qırımtatar jurnalistleriniñ ükümlerini ğayrıdan baqmasına çağırdı.
2019 senesi martnıñ 27-nde Rusiye İç işler nazirligi ve Rusiye gvardiyasınıñ hadimleri Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal tutuldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.