Erdoğan, Putinni Türkiye askerlerine Suriyede keder etmemesine çağırdı
Türkiye prezidenti Recep Tayyip Erdoğan Rusiye prezidenti Vladimir Putinnen telefonda laf etip, Rusiyeden Türkiye askerlerine Suriyede keder etmemesini istedi, dep bildirdi. Bu aqta «Nastoyaşçeye Vremâ» haber ete.
Erdoğan, telefon subeti aqqında tarif etip, Rusiye türk askerlerini Başar Asad «rejiminen yalıñız qaldırmalı», dep qoştı.
«Rusiyeniñ andaki niyetlerini añlamaymız», – dep ayttı Türkiye prezidenti İstanbulda Adalet ve Kalkınma Partisiniñ deputatlarınen körüşip.
Fevralniñ 28-nde kerçekleşken Putin ve Erdoğannıñ telefon subeti aqqında Kreml bildirgen edi.
«Bir çoq qurban, hususan Türkiye askerleriniñ elâk olmasına sebep olğan İdlib vaziyetiniñ kerginleşüvi sebebinden ciddiy qayğı bildirildi», – dep aytıldı Kreml haberinde.
Fevralniñ 28-ne keçer gecesi Suriyeniñ İdlib şeerinde Türkiye arbiyleriniñ mevzilerine qarşı yapılğan raketa ücümi neticesinde 33 Türkiye askeri elâk oldı, daa 32-si yaralandı. Suriyede doquz yıl devam etken cenk içinde bu ğayıplar Türkiye içün eñ büyük oldı.