Donbasta bir ukrain arbiyi elâk oldı, 4 asker yaralandı – ştab

Martnıñ 3-nde Donbasta aydutlar ateşkes rejimini yedi kere bozdı. Bu aqta Birleşken quvetler tedbirleri ştabı bildirdi, dep haber ete Azatlıq Radiosı. 

«Duşman Minsk añlaşmalarınen yasaqlağan 82 mm kalibrli mayın atıcılarından, çeşit sistema granata atıcılarından, büyük kalibrli qurşunatqıçlarından ve atıcılıq silâsından mevzilerimizge ateş açtı», – dep aytıla haberde.

Ateş neticesinde bir ukrain arbiyi elâk oldı, dördü yaralandı.

«DNR» qanunsız silâlı gruppirovkası, Ukraina askerlerini Donetsk civarlarını ve Sahanka köyüne ateş açqanında qabaatladı. 

Martnıñ 1-nde Donbasta Rusiye desteklegen aydutlar tarafından Ukraina quvetlerine qarşı açılğan ateş neticesinde bir ukrain arbiyi elâk oldı, altısı yaralandı.

Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.

BM malümatına köre, 2019 senesi oktâbrniñ 31-ne qadar silâlı zıddiyet neticesinde Donbasta 13000 - 13200 insan elâk oldı.