Ukrainada karantin sertleştirile (video)
Ukraina Nazirler şurası aprelniñ 6-ndan itibaren çalışıp başlaycaq qoşma sıñırlavlar cedvelini tasdıqladı. Ukraina ükümeti şiş kebabından ve park kezintilerinden vazgeçmege çağıra. Acele bir şey olmasa, soqaqqa çıqmamağa çağıralar. Cemaat yerlerinde maskada ya da respirator taqmalı. Akimiyetniñ daa evel ilân etken sıñırlavlarına insanlar qulaq asmadı ve maskasız yürdi. Paytahtqa yaqın olğan köy sakinleri – ekseriy allarda pensionerler – naqliyatsız ve ilâcsız qaldı. Aprel 3-niñ sabasına qadar Ukrainada (işğal etilgen Qırım ve Donbas topraqları sayılmay) 942 COVID-19 koronavirus hastası laborator tedqiqlerinden soñ tasdıqlandı, 23 insan vefat etti, 19-ı tüzeldi. Bir künde 138 yañı hasta qayd etildi.