Qırımlılarğa üç yaşından yedi yaşına qadar balalar içün nefaqa berecekler – akimiyet

Qırımnıñ Rusiye parlamenti üç yaşından yedi yaşına qadar balalarğa er ay nefaqa berüv qanun leyhasını qabul etti. Nefaqa miqdarı Qırımda yılnıñ ekinci kvartalında belgilengen balalar içün yaşayış azğarınıñ yarısını teşkil etecektir. Bu aqta parlamentniñ matbuat hızmeti bildirdi.

«Ana ya da babanıñ onıñnen beraber yaşağan 3 yaşından 7 yaşına qadar bala içün nefaqa almağa aqqı bardır, böyle şahıslarnıñ orta kişilik keliri Qırım Cumhuriyetinde işbu nefaqa almaq içün muracaat etken yıldan evelki yılnıñ ekinci kvartalında belgilengen yaşayış azğarından çoq olmamalı», – dep qayd etti Qırımnıñ Rusiye parlamentiniñ spikeri Vladimir Konstantinov.

İşğal etilgen Qırımda koronavirus pandemiyası sebebinden 2020 senesi iyünniñ 1-nden başlap 3 yaşından 7 yaşına qadar balalar içün er ay nefaqa berecegini vade ettiler. 

3 yaşından 7 yaşına qadar bala nefaqası 5 612,7 ruble olacaq.

Qırımda aprelniñ 3-nden 6-na qadar acele bir şey olmasa, evden çıqmağa yasaq etildi. Koronavirus yuqunçınıñ tarqaluvına yol bermemek içün işğal etilgen Qırımda ve Aqyarda «yüksek seviyeli azırlıq» rejimi kirsetildi.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.