Qırım parkındaki Keriç köprüniñ kopiyası üzerinde çatmalar peyda oldı (+foto)
Keriçte Komsomol parkında tiklep qoyulğan Keriç köprüniñ miniatür kopiyası çatladı. Qırım.Aqiqat mühbiriniñ bildirgenine köre, çatmalarğa baqmadan instalâtsiyanı qapatmağanlar – yolcular andan alâ daa keçip olalar.
İlk çatmalar küzniñ başında peyda olğan. Keriçniñ Rusiye memuriyetiniñ başı Sergey Borozdin, tamir işelerni obyektni qurğan "Stroygarant" sıñırlanğan mesüliyetli şirket (SMŞ) yapa, dep bildirgen edi.
Qırım.Aqiqat mühbiriniñ haber etkenine köre, al-azırda köpürniñ kopiyası altında sıva işlerniñ izleri bar, amma inşa üstünde alâ daa aralar ve çatmalar körüne eken.
Ukraina Tış işler naziriniñ birinci muavini Emine Ceppar AB daimiy vekiller komitetine Ukraina topraq bütünligini ve suverenitetini bozuv, hususan Keriç köprü qurucılığı ile bağlı şahıs ve teşkilâtlar cedvelini kenişletmek qararını qabul etkeni içün teşekkürler bildirdi.
AB elçileri Keriç köprüniñ qurucılığı içün eki şahıs ve dört şirketke qarşı sanktsiyalarnı tasdıqladı.
Daa evel berilgen malümatqa köre, Qıbrız Keriç köprü qurucılığı sebebinden kirsetilgen Avropa Birligi sanktsiyalarını blok ete. AB, bu köpürni qurğan şirketlerge qarşı sanktsiyalarnı 2018 senesi iyül ayında kirsetti.
İyünniñ 18-nde Ukraina Tış işler naziri Dmıtro Kuleba bildirgenine köre, Avropa Birligi Şurası Qırım işğali sebebinden Rusiyege qarşı sanktsiyalarnı bir yılğa uzattı.
Sanktsiyalar 2014 senesi Rusiyeniñ yarımada işğaline cevap olaraq kirsetildi. O vaqıttan berli bir qaç kere uzatılıp kenişletilgen edi.
Keriç boğazındaki köpürniñ maşina qısmı 2018 senesi mayıs ayında yengil maşinalar içün açılğan edi, daa soñra yük maşinalarınıñ areketi başlatıldı. Köpürniñ demiryol qısmı daa azır degil.
2019 senesi dekabr ayında Rusiye prezidenti Vladimir Putin köpürniñ tren areketini başlattı.
Ukrainanıñ beşinci prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.