“Yazı kene yañlış”: ukrain elçiligi Rusiyege Qırımdaki Ay-Petri Ukrainanıñ olğanını hatırlattı
“Bu Ay-Petri resmi acayip, Qırım, Ukraina. Amma yazısı kene yañlış, Rusiye elçiligi. Bu, hayaliy canavarlar bugün güzel Qırımda yaşamaqtan daa büyüktir, amma ebediy degil”, – yazıla bildirmede.
Evel, Ukraina medeniyet ve haber siyaseti naziri Aleksandr Tkaçenko Büyük Britaniya ve Şimaliy İrlandiyanıñ Ukrainadaki elçisi Melinda Simmonsqa muracaat etip, BBC-niñ Rusiye hızmetiniñ Aqmescit ve Aqyar “Rusiye şeerleri” olaraq adlandırmasına cevap bermesini istedi.
Ukraina TİN BBC News Russian-ni Aqmescit ve Aqyarnı “Rusiye şeerleri” olaraq adlandırmamasına çağırdı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.