ABD, Qırımnı işğalden qurtarmaq içün çoq şey yapa bile – Kuleba
ABD prezidenti Joseph Bidenniñ yañı memuriyeti Qırımnı işğalden qurtarmaq içün çoq şey yapa bile. Böyle fikirni Ukraina Tış işler naziri Dmıtro Kuleba «Prâmıy» telekanalınıñ yayınında ayttı.
«Evelki memuriyet pek müim adım attı – bu Pompeonıñ «Qırım platforması». Biz «Qırım platformasını» başlatamız ve ABD Qırımnı işğalden qurtarmaq içün kerçekten çoq şey yapa bile», – dedi Kuleba.
Nazirniñ qayd etkenine köre, München telükesizlik konferentsiyasında prezident Biden, Washington Ukraina topraq bütünliginiñ tarafdarı qalacaq, dep qayd etti.
Hatırlatamız, Biden Avropa ittifaqdaşlarını Washington fikirlerinden vazgeçmemelirne çağırdı.
2020 senesi oktâbr ayında ABD diplomatları Qırımnı işğalden qurtaruv platformasını qurmaq içün Kyiv ile işbirligi yapmağa azır, dep bildirgen edi.
2018 senesi iyülniñ 25-nde o vaqıt ABD devlet kâtibi olğan Mike Pompeo Amerika Birleşken Devletleri Rusiyeniñ Qırım ilhaqını iç bir vaqıt qabul etmeycegi aytılğan «Qırım beyannamesini» çıqardı. Pompeo, ABD Ukraina topraq bütünliginiñ ğayrıdan tiklenmesini kene israr etecek, dep bildirdi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.