Ukraina ve Türkiye Qara deñiz regionında «işbirliginiñ terenleştirüvini» muzakere ettiler – Tış işler nazirligi

Ukraina ve Türkiye «Kvadriga» formatında siyasiy-mudafaa mesleatlarını keçirip, «Qara deñiz regionında telükesizlik ve mudafaa saasındaki işbirliginiñ terenleşüv yollarını» muzakere etti. 

Ukraina Tış işler nazirliginiñ matbuat hızmeti bildirgenine köre, Türkiye tarafını Türkiye Tış işler nazirliginiñ Avrasiya memleketleri departamentiniñ müdiri Yönet Can Tezel ve Türkiye Milliy mudafaa nazirliginiñ mudafaa ve telükesizlik meseleleri baş müdirliginiñ baş müdir muavini Tuğamiral Özgür Özcan Altunbulak temsil ettiler.

«Mesleatnıñ ayrı mevzusı Rusiye tarafından vaqtınca işğal etilgen Qırım yarımadası ve Donetsk ve Lugansk vilâyetlerindeki vaziyet oldı. Türkiye vekilleri Ukraina suvereniteti ve topraq bütünligine qol tutqanını, Qırım ilhaqını tanımağanlarını tasdıqladı. Türkiye tarafı devletimizniñ Avropaatlantik kursını ve NATO azası olmaq ıntıluvlarına qol tutqanını qayd etti», – dep aytıla haberde.

Türkiye diplomatı Yönet Can Tezel memleketiniñ «Qırım platforması» işinde iştirak etmege azır olğanını ayttı.

Qırımda martnıñ 16-nda, dünya tanımağan «referendum» yılında, Türkiye Tış işler nazirligi Ukraina suvereniteti ve Ukraina topraq bütünligine qol tutıp, al-azırda Rusiye kontroli altında olğan yarımadadaki «vaziyetni tanımaycaq», dep bildirdi.

Ukraina baş naziriniñ muavini, Ukrainanıñ vaqtınca işğal etilgen topraqlarınıñ reintegratsiya meseleleri naziri Oleksiy Reznikov ve Ukrainada Türkiye elçisi Yağmur Ahmet Güldere Rusiye işğali sebebinden yarımadanı terk etmege mecbur olğan qırımtatarlar içün ev qurucılığı leyhasını muzakere etken ediler.

Türkiye prezidenti Recep Tayyip Erdoğan, Ukraina prezidenti Volodımır Zelenskıynen 500 qırımtatar qorantası içün ev qurucılığı aqqında añlaştı, dep bildirgen edi. Daa soñra Türkiye eyyeti Herson ve Geniçeskte topraq baqıp sayladı.