Aqmescitteki «Hizb ut-Tahrir davasınıñ» mabüsleri apis cezasınıñ uzatıluvına qarşı istinafnı yutturdı – faaller
Moskvadaki Vlasiha İstinaf arbiy mahkemesi Aqmescitteki ekinci «Hizb ut-Tahrir davasınıñ» mabüsleri Seytveli Seytabdiyev, Rustem Seythalilov, Ruslan Suleymanov ve Asan Yanikovnıñ sıñırlav tedbirini uzatuv şikâyetini red etti. Bu aqta «Qırım birdemligi» cemaat birleşmesi Qırım.Aqiqatqa bildirdi.
Qayd etilgenine köre, bu davanıñ daa bir mabüsi Akim Bekirov tehnik sebeplerden oturışuvda iştirak etmesi içün bağlanamadı, şunıñ içün onıñ istinafını mahkeme ayrı baqacaq.
İmaye apiste tutuv müddetleriniñ uzatılmasına qarşı itiraz bildirdi: advokat Safiye Şabanova müvekkilleriniñ qabaatı daa isbatlanmadı, demek, olar cinayetçi sayılamaz, dep bildirdi. Aman-aman bütün mabüsler çoq balalı baba ola, qorantaları bar, yaşağan yerlerinde müsbet tarafları aqqında aytalar.
«Berilgen qabaatlavnıñ ağırlığından ğayrı, mahkeme o qadar uzun apis müddetiniñ sebebini añlatmadı, Avropa insan aqları mahkemesiniñ qaidelerine uyğun degil», – dep qayd etti imayeci.
Mart ayında Kreml kontrolindeki Qırım Yuqarı mahkemesi Aqmescitteki ekinci «Hizb ut-Tahrir davasınıñ» mabüsi Asan Yanikovnıñ istinafını red etti. Advokat Safiye Şabanova Yanikov davasınıñ malümatlarını ögrenüv aqqını sıñırlağan Aqmescitteki Kiyev rayon mahkemesiniñ qararına qarşı istinaf şikâyetini berdi.
Hatırlatamız, fevralniñ 3-nde Vlasiha şeerindeki İstinaf arbiy mahkemesiniñ oturışuvında Aqmescitteki «Hizb ut-Tahrir davasınıñ» mabüsleri Seytveli Seytabdiyev, Akim Bekirov, Rustem Seythalilov, Asan Yanikov ve Eskender Suleymanov Rusiye mahkemesiniñ erkânını ve oturışuvdaki prokurornı çetleştirdi.
Yanvarniñ 18-nde Asan Yanikov ve Aqmescitteki ekinci «Hizb ut-Tahrir davasınıñ» diger mabüsi Seytveli Seytabdiyev Aqmescitten Rostov-na-Donu SİZO-1-ge etap etildi.
Rusiyeniñ Rostov-na-Donu Cenübiy okrugı arbiy mahkemesi Aqmescitteki «Hizb ut-Tahrir davasınıñ» mabüsleri Cemil Gafarov, Servet Gaziyev, Alim Karimov, Seyran Murtaza ve Erfan Osmanovnıñ apis müddetini yarım yılğa uzattı, soñra olarnı Aqmescit SİZOsından Rusiyege etap etecekler.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.