Refat Çubarov musulmanlarnı Qurban bayramınen tebrikledi: «Qırım mıtlaqa azat etilecek»
«Er yıl Qurban Bayramı künlerinde bizler Yüce Allahqa dua etip, O, er birimizge, yaqınlarımızğa, dostlarımızğa, qomşularımızğa köstergen merhameti içün şükür etemiz. Ama işte sekiz yıldan berli er bir bayramda şükür dualarınen bir sırada biz Allahu Tealâdan maneviy birligimizni ve quvetimizni küçlendirip Vetanımız tuvğan Qırımımıznıñ rus işğalinden azat etilmesini isteymiz», – dep yazdı Çubarov.
Onıñ qoşqanına köre, «Qırım ve Donetsk ve Lugansk vilâyetlerindeki bazı rayonları Rusiye zaptçılarından mıtlaqa azat etilecek, çünki Yüce Allah merhametli ve adaletlidir».
Çubarov Qurban bayramında Qırımda tuvğanlarını ve dostlarını ziyaret etecek insanlarnı ğayıp olğan qırımtatarlar, siyasiy mabüslerniñ qorantalarına barıp, bala ve apaylarınen laf etmesine, esli-başlı ana-babalarına qol tutmalarına çağırdı.
«Qırımtatar Milliy Meclisi adından ve kendi şahsımdan İslâm dinine mensüp butün Ukrayina vetandaşlarını Qurban bayramınen hayırlayım! Sizlerniñ, yaqınlarıñız ve qomşularıñıznıñ evleri quvanç ve bereket ile tolsun!», – dep qoştı Meclis reisi.
Ukraina prezidenti Volodımır Zelenskıy musulmanlarnıñ Qurban bayramını tebriklep, eyilik ve amanlıq tiledi. Ukraina ombudsmanı Lüdmila Denisova Qurban bayramında Rusiye apsinde tutulğan qırımtatarlar aqqında hatırlattı.
Qurban bayramı – musulmanlarnıñ eñ büyük bayramlarından biri olıp, Mekkege acılıqnıñ soñuna kelgenini temsil ete. Oraza Bayramından 70 kün keçken soñ qayd etile.
Qurban Bayramı büyük meydanlarda cemaat ile qılınğan bayram namazından başlana ve ondan soñ qurban çalına. Bu ananeniñ tamırları Allahnıñ İbraim peyğamberge oğlu İsmailni qurban ketirmege bermeyip, qoynı kesmege buyurıp toqtatqanından kele.