Avropa parlamenti Rusiye akimiyetiniñ «Memorial»nı qapatmağa ıntıluvlarını takbih etti
Avropa Parlamenti Rusiye akimiyetiniñ "Memorial" ve "Halqara Memorial" uquq qoruyıcı merkezini qapatmaq ıntıluvlarını ve taqiplerini ayıplağan qararnı qabul etti ve bu areketlerni "siyasiy motivli" adlandırdı. Bunı Azatlıq.Radiosı haber etti.
Avropa Parlamenti Memorialğa qarşı bütün qabaatlarnıñ deral lâğu etilmesine ve teşkilâtnıñ ükümetniñ kirişmesi olmadan işini devam ettirmesine çağırdı. Parlament azaları AB Yuqarı temsilcisi Jozep Borrelni "Memoraial" ğa etilgen basqılarğa alâqalı olğanlarğa qarşı sanktsiyalar qoymağa çağırdı.
Bundan ğayrı, qararda Rusiyede "çetel agentler" ve "istenilmegen teşkilâtlar" aqqında qanunlarnıñ qullanuv meselesine de toqunılır. Avropa parlamenti bu qanunlarnıñ lâğu etilmesini ve olarnıñ qullanuvı neticesinde ketirilgen zarar ödenilmesi içün tedbirlerniñ körülmesini talap ete.
"Avropa Parlamenti Rusiye vatandaş cemiyetinine ve uquq qoruyıcılarğa destegini bir daa bildire, Rusiyeni halqara insan aqları standartlarına uyğun olaraq vatandaş cemiyeti içün aydın uquqiy baza ve telükesizlik iş müitini yaratmağa çağıra", - dep yazıla vesiqada.
Memurlar Avropa Birligi ve AB aza devletleriniñ elçilerini ve mahkeme diñlevlerinden soñ "Memorial" uquq qoruyıcı merkezine ve "Halqara Memorial" ofisini ziyaret etmege çağıra.
Noyabrniñ 11-nde malüm oldı ki, Rusiye Baş prokuraturası "Halqara Memorial" uquq qoruyıcı teşkilâtnıñ "çetel agentler" aqqında qanunını sistematik şekilde bozmaqnen qabaatlap onı qapatmaq içün Yuqarı mahkemede dava açtı. Moskva prokuraturası ise "Memorial" uquq qoruyıcı merkeziniñ qapatılması talabı ile Moskva şeer mahkemesinde dava açtı.