ABD Nariman Celâl ve bu davanıñ diger mabüslerini azat etmege çağırdı
"Tünevin mahkeme Qırımtatar Milliy Meclis reisiniñ birinci muavini Nariman Celâlnıñ ve bu davanıñ diger mabüsleriniñ tevqif müddetini uzattı. İşğalci organlar adamlarnı azat etmeli ve başqa fikirde olğanlarnı taqip etmek maqsadı olğan uydurılğan qabaatlarnı lâğu etmeli", - dep yazıla bildirmede.
Rusiye nezaretinde olğan Aqmescitteki Kiyev rayon mahkemesi Qırımda «gaz borusındaki diversiyada» şübheli sayılıp apiske alınğan qırımtatar siyasetçisi ve faali, Qırımtatar Milliy Meclis reisiniñ birinci muavini Nariman Celâl ve ağa-qardaş Aziz ve Asan Ahtemovlarnıñ tevqif müddetini uzattı.
Dekabrniñ 15-nde advokat Nikolay Polozov Qırımda Rusiye quvetçileri Anğara köyünde «gaz borusındaki diversiya» davası boyunca ilk tahqiqatnı yekünledi, Nariman Celâlğa daa bir qabaatlav qoşuldı, dep bildirdi.
Noyabrniñ 8-nde Celâl patlayıcı cihaznıñ qaçaqçılığında da qabaatlandı. Oktâbrniñ 28-nde faalniñ SİZOda qaluv müddeti 2022 senesi yanvarniñ 23-ne qadar uzatıldı.
Dekabrniñ 3-nde Rusiye kontrolindeki Qırım Yuqarı mahkemesi Celâlnıñ apiste tutuv müddetini uzatuv qararına qarşı istinaf şikâyetini red etti.