"Açıq kök altında apishanede kibi yaşaymız"
Bugünde-bugün olar azatlıkhtan marum etilgen ve SİZO, cezahanelerde ya da ev apsinde bulunalar, ya da Rusiye Federatsiyasında ya da işğal etilgen qırımda "cezalarını çekeler". Söz Amet Suleymanov, Remzi Bekirov, Suleyman (Marlen) Asanov, Seyran Saliyev, Server Mustafayev, Nariman Memedeminov, Ruslan Suleymanov, Osman Arifmemetov, Rustem Şeyhaliyev, Nariman Câlâl, Aleksey Bessarabov Vladislav Yesipenko aqqındadır.
Fotoresimler sergisiniñ açılışında tevqif etilgen vatandaş jurnalistleriniñ ömür arqadaşları bar edi. Siyasiy mabüs Seyran Saliyevniñ apayı Mümine Saliyeva böyle dedi: "Rusiyede mustaqil ihtisasiy jurnalistika qıyın künler yaşay. 2014 senesinden başlap Qırım de-fakto Rusiyeniñki olğan soñ aynı aqiqat Qırımda da. 2017 senesi Aqmescitniñ civarlarından birinde tintüvler keçirilgen soñ, vaqia yerinden strim yapqan 10-ğa yaqın faal tutıldı. Ertesi künü bu adamlar mahkemelengende, mahkeme binası yanında yüzlerce adamlar toplaştı, olar destek kösterip telefonlarını alıp strim yapıp başladılar. Bizim, tevqif etilgen vatandaş jurnalistleriniñ apayları içün aqaylarımıznıñ işi adiy bir iş ya da adiy zenaat degil, bu missiyadır. Apishanede bulunıp bile, olar öz işini devam eteler".
Qırım MC-deki Ukraina prezidentiniñ daimiy temsilcisi Anton Körineviç dedi: "Bugün kerçekten de biz öyle bir vaziyettemiz ki, muvaqqat işğal etilgen Qırımda söz serbestligi mümkün degil. Anda yayında kösterilgen malümat sahte ya da yalan olması içün er şey yapıla. Böyle vaziyette vatandaş jurnalistler peyda oldı, olar tecribesiz olıp, dünyağa işğal etilgen Qırımda yüz bergen vaqialarnı köstermek içün bu müim işni yapıp başladılar".
Siyaisy mabüs Rezmi Bekirovnıñ apayı Halide çıqışta bulunıp, Qırımda vatandaş jurnalistleriniñ balalırı babaları kibi aynı faaliyet ile oğraşmağa tüşüngelerine diqqat etti: "Biz, yaqalanğan vatandaş jurnalistleriniñ qorantaları, açıq kök altında apishanede kibi yaşaymız. Menim balalarım sıq-sıq jurnalist olmağa istegenlerini ve basqılarnı, bugünki yaşayşnı aydınlatmağa istegenlerini aytalar".
Mabüslerniñ apayları, aqayları azatlıqtan marum etilip, kündelikler yazğanlarını ve olarnıñ bir qısmı haber vastalarında, şu cümleden Qırım.Aqiqat saytında yayınlanğanını ayttılar.