Mariupolde ekim qalmadı – şeer yolbaşçısınıñ mesleatçısı

Mariupolde ekim qalmadı, dep bildirdi şeer yolbaşçısınıñ mesleatçısı Petro Andryuşçenko.

«Bugün Mariupol ekimsiz qaldı. Mariupolde 17 insandan ibaret beyaz urbalı moskvalı işğalciler desantı çalıştı. Bugün olarnı evge yolladılar. Mariupol ekimleri bundan evel de yoq edi. Yani bugün Mariupolde tibbiy yardım qalmadı, dep aytmaq mümkün», – dep ayta o.

Cenk ve şeerniñ Rusiye tarafından işğali devam etkeninden bu haberlerni başqa menbalarda teşkermege imkân yoq.

Rusiye tarafı bunı şimdilik izaatlamadı.

Mariupol fevralniñ 24-nde başlağan Rusiye istilâsınıñ ilk künlerinden Rusiye ordusı tarafından sarıp alındı.

Ukrayına ükümeti işğal altındaki Mariupolde şimdi eñ büyük gumanitar felâket bar, dep bildire. İyünniñ 6-nda şeer yolbaşçısınıñ mesleatçısı Petro Andryuşçenko Rusiye işğal etilgen şeerde holera qırğınlığı olacaq, dep azırlanğanını ayttı.

Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrayınalılarnıñ tirenüvi sebebinden Kyivni zapt etemedi.

Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.

Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.