"Kollaborantlar işğalcilernen beraber qaçacaq" – faaller Qırımda "qırımtatar batalyonını" yaratmaq planları aqqında
Qırımtatar kollaborantları Ukrayina Silâlı Quvetleriniñ qarşı ücümi zamanı işğal etilgen Qırımnı mudafaa etmek içün "qırımtatar batalyonını" yaratmaq niyetinde olğanlarını bildirdiler. Olar emindirler ki, böyle qırımtatarlar çoqtır ve olar "qollarına senek alıp cumhuriyetni qorçalamağa keterler". Qırımtatar halqı arasında soñ derecede meşur olmağan şahıslarnıñ bu cesaretli bildirmeleri arqasında ne bar, Qırım.Aqiqat ögrenmege qarar berdi.
Qırımnıñ Rusiye yolbaşçısınıñ muavini Refat Derdarov "Krım24" Rusiye telekanalınıñ yaynında dedi ki, Qırımdaki qırımtatarlar arasında "qırımtatar batalyonı"na birleşmek istegenler bar eken.
"İnsanlarnen çoq laf etişip, eminim ki, mında deral qırımtatar batalyonı peyda olacaq. Tar olacaq. Olar birden tüşünecekler, em ücretli askerler, em de ketkenler, em de bizim halqımızğa bir şeyler aytmağa istegenler", - dedi Derdarov.
Bunıñ kibi fikirni "Qırım birligi" regional cemaat teşkilâtınıñ reis muavini Rustem Nimetullayev bildirdi. Ayrıca qırımtatarlar "qollarına senek alıp cumhuriyetni qorçalamağa keterler" qayd etti.
"Nasıldır bir batalyonlarnıñ kelmesine kelgende, episini anda toplasınlar, Qırımdaki qırımtatarlar olarğa nasıl cevap bereceklerini körirler. Bunı tam eminliknen deyim, çünki halqımıznıñ bugünki mizaclarını köremiz", - dedi Nimetullayev.
QMM reisiniñ muavini İlmi Ümerov Qırım.Aqiqatqa bunı izaatlar eken dedi ki, bunıñ kibi fikirler Qırımnıñ işğalden azat etilmesiniñ arbiy variantınıñ doğrulığını istbatlay.
"Derdarov Qırımda Ukrayina qıtasından qaytqan qırımtatarlarğa qarşı cenklecek "qırımtatar" Rusiye batalyonını yaratmağa azır olğanını bildirdi. Derdarov bunı öz ğayesi kibi taqdim ete. Sersem siyasetçi Rusiye işğali devrinde şaraitniñ tazyığı altında öz tuvğan toprağını terk etmegen yüz biñlernen qırımtatarnıñ işğalden azat etilmesini yengilleştirüv aqqında fikir yürsetmek yerine, halqı içün daa nasıl qıyınlıqlar yaratmaq aqqında tüşüne. İşğalciler, şu cümleden kollaborantlar da, Ukrayina ordusınıñ qarşı ücümi zamanı nasıl ve qayda qaçıp qurtulacaqlarını artıq şimdi tüşünip başlamalılar. Evelleri, makeme davasınıñ baqıluvları vaqtında, Qırımnıñ azat etilüviniñ meselesini çezmek içün yalıñız diplomatik yolnı körgenimni inatlıqnen dey edim. Bugünde ise yalıñız cenk yolunı körem, çünki Rusiye başqa yolnı añlamay. Ve bu topraq kim içün "tar" olacağını daa körürmiz. Eminim ki, kollaborantlar iç bir batalyon teşkil etmezler, Rusiye yutquzacaq, Ukrayina ise evelki sıñırlarını qaytaracaq", - dedi İlmi Ümerov.
Qırımtatar faali Erfan Kudusov Qırım.Aqiqatqa bunı izaatlar eken dedi ki, aqiqat qırımtatarlarnıñ Ukrayinanı desteklemesine delâlet ete.
"Ukrayinağa hainlik yapqanlar nasıldır bir arbiy birleşmelerniñ tizilüvi aqqında deyler. Para olmadan olar 200 kişilik bir miting bile toplap olamaycaqları aytmaq isteyim. Buña köre de bütün bular olarnıñ isteklerinden başqa bir şey degil, albuki Ukrayina qıtasında qırımtatarlardan ibaret olğan arbiy birleşmeler yaratılğan. Bütün bular qırımtatarlar Ukrayinanıñ tarafında olğanını köstere, hainler ise Qırım azat etilgen soñ unutılacaqlar. İnsanlarnıñ seferberlikten Qırımdan nasıl qaçqanlarını köremiz, olar Rusiye ordusında hızmet etmek istemeyler. Ahmaqlıq ya da propagandağa oğrap Rusiye işğal ordusına qoşulğan kişiler artıq peşman oldılar ya da öldiler", - dedi faal.
Qırımtatar faali, sabıq Kreml mabüsi İsmal Ramazanov, kollaborantlarnıñ sözlerini provokatsiya ve "saiplerini memnün etmek" istegi dep saya.
"Ne yazıq ki, menim içün bir qırımtatar olaraq halqımnıñ arasında satqınlar da bar. Böyle kollaborantlar saipleriniñ hoşuna ketken er şeyni aytacaqlar. Olar "qırımtatar batalyonını yaratacaqlarını" deyler, amma Ukrayinanıñ qıtasında artıq qırımtatar batalyonı bir. Eminim ki, Qırımda Ukrayinanıñ vaqtınca işğal altında olğan Qırımnı azat etmege başlağanı aqqında haber peyda olğanınen, halqım arasında azat etkenlerni qarşılaycaqlar çoq olacaq. Halqımnıñ adından laf etkenlerini bildirgen provokatorlarğa kelgende, olar Qırımdan işğalciler ile beraber qaçacaqlar. Qırımtatar halqı azatlıqnıñ qıymetini bile ve kim dost, kim duşman olğanını pek yahşı añlay. Şimdi Qırımda partizan areketi faalleşti, bu ise öz nevbetinde yarımada işğalden azat etilüvni beklegenini isbatlay. Qırımtatar halqınıñ cinaiy sürgün etilüvi vaqtında Qırımdan er kesni, sovet akimiyeti ile işbirlik etkenlerni de sürgün etken ediler. Hainlerni kimse ürmet etmey, şunıñ içün olar içün pek keç olmağance Qırımdan şimdi qaçmaları daa yahşı", - dedi Ramazanov.
Qırım işğal etilgen soñ qırımtatar halqınıñ temsiliy organı QMM Ukrayinağa sadıq qaldı. Qırımtatar halqı lideri Mustafa Cemilevniñ sözlerine köre, Milliy Meclisniñ 2014 senesi Rusiyeniñ Qırımda keçirgen "referendumnı" boykot etmek çağıruvı tek qırımtatarlar tarafından degil, başqaları tarafından da desteklendi.
Qırım yarımadasınıñ işğaline qarşı turmaq içün Noman Çelebicihan adına Qırımtatar göñülli batalyonı teşkil etilgen edi. Bundan ğayrı Ukrayina Silâlı Quvetleri terkibinde cenkleşken "Qırım" batalyonı tizilgen.
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.