Ukrayına Nazirler şurası Qırımnıñ mesken yerleriniñ adlarını deñiştirüvnen bağlı mesleatlar keçirecek
Ukrayına prezidenti Volodımır Zelenskıy «Ukrayına mesken yerlerinde coğrafik adlarnıñ qullanuv tertibi ve toponimiyanıñ dekolonizatsiyası «Coğrafik adlar» Ukrayına Qanunına deñişmelerniñ kirsetilüvine dair» №7253 qanunını imzaladı. Bu aqta Yuqarı Rada saytındaki vesiqada aytıla.
Qanun coğrafik obyektlerge Rusiye ya da meşur yerleri, kün, adise, Ukrayınağa (ya da başqa memleketke) qarşı istilâ yapqan erbaplarını, totalitar siyasetni ve totalitar sovet ve Rusiye rejimini tenqit etkeni içün taqiplerni maqtağan adlar bermege yasaq ete.
Ukrayına prezidentiniñ Qırım Muhtar Cumhuriyetindeki temsilciligi bildirgenine köre, Ukrayına Nazirler şurası bu qanun işke tüşürilgeninden altı ay içinde Ukrayına tamır halqlarınıñ temsiliy organlarınen mesleat keçirip, Ukrayına Yuqarı Radasına Qırım yarımadasınıñ Rusiye imperiya siyasetiniñ timsalleri olğan mesken yerleriniñ adlarını deñiştirüvnen bağlı tekliflerini bermeli.
Qanun Qırım Muhtar Cumhuriyeti ve Aqyar şeerinde şeer ve soqaq adlarını deñiştirmege imkân bere.
Qırımtatar Milliy Meclisiniñ reisi Refat Çubarov işğal etilgen Aqyarğa tarihiy adını qaytarmağa teklif etti.
Bundan evel Ukrayına milliy telükesizlik ve mudafaa şurasınıñ kâtibi Oleksiy Danılov «Qırımnıñ işğalden qurtarıluvınıñ 12 adımı» adlı paylaşuvını yaptı. Teklifler arasında – «rus şanı şeerine» «№6 Obyekti» adınıñ berilüvi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.