"Em gece, em kündüz sesli olacaq". Ukrayina Silâlı Quvetleriniñ Qırımda arbiy obyektlerge ücümleri mevsimi nasıl keçe?

İşğal etilgen Qırımda küz başlanğanınen Rusiye arbiy obyektlerine ücümler aman-aman er kün ola. Keçken afta ücümge oğrağan obyektler aqqında tasdıqlanğan malümatqa köre, Ukrayina Mudafaa Quvetleriniñ Qırım yarımadasındaki prioritetli nişanları arasında Rusiye Qara deñiz flotunıñ gemileri ve obyektleri ve Rusiye Ava mudafaası sistemaları edi.

Qırımnıñ Rusiye akimiyeti adetince Qırım yarımadasındaki arbiy obyektlerge ücümlerniñ neticelerini gizlemege ya da küçültip köstermege tırışa. Bu vaziyette işğalci Vladimir Konstantinov Rusiye Ava mudafaasınıñ çalışmasınıñ fotolarını çekken ve soñra yayınlağanlağa para cezası berilmesini teklif ete.

Bu ücümlerniñ semereligi, Rusiyeniñ Ukrayinağa qarşı cenkiniñ ketişatına nasıl tesir etkeni ve Qırımdaki Rusiye akimiyetiniñ olarğa nasıl cevap bergeni aqqında Qırım.Aqiqat Radiosınıñ alıp barıcısı Sergey Mokruşin "Strategiya XXI" Globalistika merkeziniñ arbiy programmalar reberi Pavlo Lakiyçuk ve Ukrayina Silâlı Quvetleriniñ yedekte olğan 1-nci dereceli kapitanı, "Sonata" şirketiniñ strategik ekspertı Andriy Rıjenko ile laf etti.

Keçken afta bir sıra "ücümler" Qara deñiz şelfindeki neft çıqaruv platformalarınıñ Ukrayina nezareti astına qaytarğan bir ameliyattan başlandı. Olar daa 2015 senesi Rusiye tarafından zapt etilgen edi. Ukrayina Mudafaa nazirliginiñ Baş istihbarat idaresi Rusiye platformalarnı arbiy maqsatlarında qullanğanını tasdıqladı.

Bu "Boyko qulleleri" üzerinde nezaret Ukrayina Mudafaa quvetleriniñ eki vazifesini al etken ameliyatlardan biridir: Qara deñizniñ ğarbiy qısmında navigatsiyanıñ temin etilmesi, naqliyat koridorınıñ eski alına ketirilmesi ve Ukrayina cenübinde ücümge keçken ukrayinalı arbiylerge yardım, logistikanıñ bozuluvı, silâ anbarlarınıñ ve duşmannıñ arbiyleriniñ yoq etilüvi, dep saya ekspert Pavlo Lakiyçuk.

Onıñ sözlerine köre, bu vazifelerniñ yerine ketirilmesi keçke sene Ukrayina tarafından Zmiyinıy adasınıñ azat etilmesinden ve platformalarğa derbelerden başlanğan. Em platformalarda, em adada bütün Rusiye radar stantsiyaları ve elektronik istihbarat cihazları yoq etildi.

"Qara deñizniñ şimal-ğarp qısmında ava ve suvastı sisteması yoq etilgen soñ ve Tarhankutda radiotehnik közetüv sistemasına darbe endirilgen soñ Aqyar deñiz körfezine muvafaqiyetli, neticeli darbeler endirilmesi içün koridor peyda oldı", - dep ayta Lakiyçuk.

Sentâbrniñ 13-nde Aqyarda patlav sesleri eşitildi. İçtimaiy ağlarda Rusiye Qara deñiz flotu arbiy gemilerni tamir etmek içün faal şekilde qullanğan Sevmorzavodnıñ yanması ile resimler yayınlandı.

BDK "Minsk" ve "Rostov-na-Donu" suvastı qayığı ciddiy zarar kördi. Pavlo Lakiyçuk dey ki, Ukrayina Silâlı Quvetleri hassas silâlarnı qullana. O, Sevmorzavod Aqyarnıñ merkezinde olğanını ve raketalarnıñ episi tam nişanğa barıp urğanını qayd etti.

Ertesi künü patlav sesleri Kezlevde de eşitildi. Soñradan S-400 Rusiye zenit-raketa kompleksi yoq etilgeni belli oldı. USQ mahsus ameliyatlar quvetleri Qırımğa desant tüşürgenini bildirdi.

Arbiy ekspertniñ fikrince, S-300 ve S-400 Ava mudafaası sistemaları Qırımnı mudafaa etmek içün yeterli degil. Şunıñ içün olarnı Rusiyeniñ şimalinden ve Uzaq şarqtan alalar. Ukrayina Mudafaa quvetleri ise Rusiye arbiy obyektlerine ücüm etmek içün bu vaqıt devamında Qırım yarımadasınıñ ğarbiy yalısı boyunca koridor açalar.

Sentâbrniñ 19-nda Aqyar ve Keriçte kütleviy tüsses aqqında haberler kelip başladı, Rusiye akimiyeti bu talimler sebebinden olğanını bildirdiler. Aqyarda böyle tüsses eki kün devam etti. Keriçte bu kibi talimler keçken sene baarde olğan edi.

Ukrayina Silâlı Quvetleriniñ yedekte olğan 1-nci dereceli kapitanı, "Sonata" şirketiniñ strategik ekspertı Andriy Rıjenkobu daa Birinci cian cenki devrinden obyektlerniñ qorunması içün qullanğan usul olğanını ayta.

"Eger raketada öptik idare etüv kanalı olsa ya da operator tarafındn idare etilgen dron olsatüsses nişannı gizlemege ve raketa ya da dronnı aldatmağa yardım ete. Bu klassik bir usuldır. Başqa bir şey yapıp olamasalar bunı yapalar", - dep qayd ete Andriy Rıjenko.

Onıñ malümatına köre, darbe endirilgen zaman Sevmorzavodda eki suvastı qayığı tamir etilmekte edi. Ve tam bu vaqıt ücüm etmek eñ qolay eken. 

"Böyle alda olğan em qayıq, em gemi mobil degiller. İskele körfezinde ise olar daima azır aldalar ve 2-3 saattan soñra bazdan çıqa bileler", - dep qayd ete o.

Kosmik keşfiyat vastalarınıñ inkişafı devrinde duşman gemilerniñ yerini belgilemek qıyın degil. Ukrayina böyle malümatnı öz ortaqlarından ala.

MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.