Новости за 08.11.2022

Бөтендөнья татар конгрессы 24 ноябрьдә узачак «Әниләр көне» уңаеннан «Әниемнең җылы кочагы» дип исемләнгән конкурс игълан итте. Бәйге 3 ноябрьдә башланды һәм 24 ноябрьгә кадәр дәвам итә. Нәтиҗәләр 2 декабрь көнне ясалачак, диелә конгресс хәбәрендә.

Мессенджерларда язып, аннары бетерелгән мәгълүмат кайчан да булса килеп чыгарга да мөмкин. Шуңа күрә яшерергә яки беркемгә дә күрсәтмәскә теләгән әйберләрне чатта язарга кирәкми. Бу турыда РИА Новости белгечкә сылтама белән хәбәр итте.

Аш тозын дөрес куллану турында Мамадыш район сырхауханәсенең табиб-кардиологы Булат Гилаев сөйләгән. Бу хакта Татарстан Сәламәтлек саклау министрлыгы хәбәр итте.

Удмуртиянең «Яңарыш» сайтында Рәфилә Рәсүлеваның «Китапханәдә татар телен өйрәнәбез» дигән язмасы чыкты.

2022 елда Алабуга районында 12 километрдан артык юл, 5 километр тротуар салынган һәм төзекләндерелгән. Шәһәр киңәшмәсендә Башкарма комитетның инфраструктура үсеше бүлеге башлыгы Евгений Николаев юл төзелеше йомгаклары белән таныштырды. Бу турыда «Алабуга нуры» хәбәр итә.

«Самар татарлары» журналының яңа саны сатуга чыкты. Ул, һәрвакыттагыча, Самарада яшәүче татарлар тормышында соңгы вакытта булган иң мөһим вакыйгаларны, шулай ук якташлар турындагы очерк һәм язмаларны үз эченә алган. Бу хакта «Самар татарлары» сайты хәбәр итә.

Зәй районында шикәр чөгендере җыю эшләре тәмамланды. Хәзер татлы тамырны кырлардан шикәр заводына ташу дәвам итә. Бу хакта «Зәй офыклары» хәбәр итә.

«Бөркетләр очарга өйрәнә» Бөтенроссия патриотик һәм комсомол җырлары фестиваль-конкурсында Кама Тамагы районы вәкилләре Вероника Кошелева, «Молодо-Зелено» һәм «Радуга» вокаль ансамбльләре чыгыш ясады.

Ютазы районында тантаналы төстә тагын бер социаль объект – капиталь ремонттан соң Яссытугай авылында чишмә ачылды. Төзекләндерелгәннән соң чишмә аеруча күркәмләнгән. Хәзер су якты буяулар белән матур итеп бизәлгән самавырдан ага. Мәйданчыкка бетон җәелгән, чүкелгән тимер койма белән әйләндереп алынган, ял итү өчен эскәмия куелган. Бу турыда «Ютазы таңы» хәбәр итә.

Татарстан мөселманнары Диния нәзарәте башлангычы белән тормышка ашырылган гошер сәдакасын җыю һәм халыкның мохтаҗ катламнарын азык-төлек белән тәэмин итү кампаниясе тәмамланды. Республика мөхтәсибәтләре арасында соңгы елларда беренчелекне бирмәгән Балык Бистәсе быел гошер җыю буенча кабат беренче урынга чыкты.