Новости за 19.02.2026

Бүген Татарстан парламенты язгы сессия эшен башлады. Депутатлар Дәүләт Советының унсигезенче утырышында 11 җәмәгать судьясын сайлап куйды.

Татарстанда җинаятьләр саны кимегән. Бу хакта җиденче чакырылыш Татарстан Дәүләт Советының унсигезенче утырышында ТР буенча эчке эшләр министры Дамир Сатретдинов сөйләде.

«Чиста булачак» төбәк яшьләр экология оешмасы Татарстан Экология һәм табигый ресурслар министрлыгы белән берлектә «Татарстанның яшел коды» проектын башлап җибәрә. Инициатива яшьләрдә экологик культура формалаштыруга юнәлтелгән һәм «Экологик иминлек» илкүләм проектына ярдәм итү өчен гамәлгә ашырыла. Бу хакта ведомствоның матбугат хезмәте хәбәр итә.

Татарстан Республикасы буенча эчке эшләр министры Дамир Сатретдинов бүген ТР Дәүләт Советы утырышында чыгыш ясады. Ул полициянең 2025 елгы эшчәлеге турында хисабында кадрларга ихтыяҗ проблемасына тукталды.

Самара Халыклар дуслыгы йортында Самара өлкәсе мөселманнары диния нәзарәте рәисе, мөфти Талип хәзрәт Яруллин мөселман милли-мәдәни берләшмәләре җитәкчеләре белән очрашты. Анда 7 мартта өлкә ифтарын үткәрү һәм аны әзерләүдә мөселман милли диаспораларының катнашу мөмкинлеге турында фикер алыштылар. Бу хакта «Самара татарлары» сайты хәбәр итә.

Чистай районы Яуширмә авылында Казан университетында Татар теле һәм әдәбияты бүлеген ачучы галимә буларак билгеле Рабига Хәкимованы искә алу чарасы үткәрелде. Галимәнең туган авылында оештырылган чара түгәрәк өстәл форматында узды. Бу хакта «Интертат» яза.

Бүген җиденче чакырылыш Татарстан Дәүләт Советының унсигезенче утырышында Азат Җиһаншинның парламент депутаты вәкаләтләрен вакытыннан алда туктату мәсьәләсе каралды. Утырышта Татарстан Рәисе Рөстәм Миңнеханов катнаша.

Республика клиник хастаханәсендә модернизация эшләре үткәреләчәк. Бу хакта журналистларга Татарстанның сәламәтлек саклау министры Альмир Абашев әйтте.

Томск политехник университетының Юрга технология институты студентлары Юрга районы Сарсаз авылының «Аман» мәчетендә булган. Юрга шәһәре имамы Җоманазар хәзрәт Умаров студентлар өчен мәчет тарихы, авыл үсеше һәм ислам дине рухи нигезләре турында сөйләгән. Бу хакта Россия мөселманнары Дини җыены үзәкләштерелгән дини оешмасы матбугат хезмәте хәбәр итә.

Россия Мәгариф министрлыгы педагогика югары уку йортларына укырга керү кагыйдәләрен үзгәртәчәк. Хәзер профильле юнәлешләргә укырга баручы абитуриентларга сайланган фәннән БДИ тапшырырга туры киләчәк. Бу хакта ведомство башлыгы Сергей Кравцов хәбәр итте. Аның сүзләрен РИА Новости китерә.

Россия Тикшерү комитеты башлыгы Александр Бастрыкин Казанның Коломенская урамындагы күп фатирлы йортның түбәсе ишелгәннән соң җинаять эше ачарга кушты.

Казаннан тыл хезмәтчәне Агезибә Вәлиева бүген туган көнен билгеләп үтә. Аңа 95 яшь тулган. Пенсионер сугыш вакытында колхозда, ә соңыннан баш киемнәре фабрикасында эшләгән. Бу хакта «Татар-информ»га ТР Хезмәт министрлыгы матбугат хезмәтендә хәбәр иттеләр.

Зәй районы Ватанны саклаучылар көне алдыннан солдатларга хәрби операция зонасына махсус гуманитар конвой илткән. Күп тонналы колоннаны район башлыгы Рәзиф Кәримов үзе озата барган. Ул махсус операция зонасындагы якташ егетләрне якынлашып килүче бәйрәм белән котлаган һәм туган яктан сәлам җиткергән.

Татарстан Республикасы Стратегик инициативалар агентлыгы 2025 ел йомгаклары нигезендә төзегән иң югары тормыш сыйфаты булган лидер төбәкләр бишлегенә керде. Бу хакта Стратегик инициативалар агентлыгының күзәтчелек советы утырышында агентлыкның генераль директоры Светлана Чупшева сөйләде.

Бүген VII чакырылыш ТР Дәүләт Советының унсигезенче утырышы белән республика парламентының язгы сессиясе ачылачак. Утырышның көн тәртибенә 24 мәсьәлә, шул исәптән 11 республика һәм биш федераль закон проекты кертелгән.

Сәхәр һәм ифтардан соң нинди догалар укырга кирәк?

Татарстан Рәисе Рөстәм Миңнеханов Стратегик инициативалар агентлыгының күзәтчелек советы әгъзасы итеп билгеләнде. Бу хакта указны Россия Президенты Владимир Путин имзалаган. Документ хокукый актларны рәсми чыгару порталында урнаштырылган.

Узган ел Татарстанда сәнәгать җитештерүе 10 процентка артты

Бүген, 19 февральдә, Татарстанда кичә урнашкан салкын һава торышы сакланачак, әмма көндез температура күтәреләчәк, дип көтелә. Бу хакта ТР Гидрометеорология үзәге хәбәр итә.