Новости за 20.03.2026

20–22 март көннәрендә «Ак барс» Көрәш сараенда Акробатик рок-н-ролл буенча бөтенроссия ярышлары узачак. Чарага Россиянең 27 төбәгеннән 2,5 меңнән артык спортчы җыелачак. Катнашучылар арасында: гамәлдәге дөнья чемпионнары һәм эре халыкара турнирларда җиңүчеләр.

Бу атна шимбә көнне, 21 мартта, Казанда, күркәм гадәт буенча, авыл хуҗалыгы ярминкәләре үткәрелә. Шәһәр халкы яшелчә, ит ризыкларын, сөт продукциясен, хуҗалык өчен кирәк-яракны ваклап сату бәясенә караганда 15 процентка арзанрак бәягә сатып алачак, дип хәбәр итә Казан мэриясе.

18 яки 23 яшькә кадәрге (әгәр алар көндезге бүлектә укыса) ике яки аннан күбрәк бала тәрбияләүче аз керемле гаиләләргә ел саен гаилә түләве каралган. Бу хакта Мах мессенджерында Россиянең социаль фонды хәбәр итә.

Бүген, Ураза бәйрәме көнендә, Биектау мөхтәсибәтенең Айбаш авылында тарихи агач мәчет комплекслы реставрациядән соң тантаналы рәвештә ачылды. Бу мәчет төбәк әһәмиятендәге мәдәни мирас объекты һәм татар авыл архитектурасы үрнәге булып тора, дип хәбәр итә ТР Диния нәзарәте.

Узган төнне Бөгелмәдә сөрем газы белән агулану очрагы булды. Толстой урамындагы 1 нче йортта яшәүче ике кеше медицина ярдәме сорап мөрәҗәгать иткән. Аларга госпитализация кирәк булмаган, аларның хәле канәгатьләнерлек дип бәяләнә. Бу хакта «Татар-информ»га ТР торак инспекциясе матбугат хезмәтендә сөйләделәр.

Әгерҗе районында март башыннан «Нур» мәчете каршындагы мәдәни-мәгърифәт үзәгендә «Без татар телен өйрәнәбез» курслары үз эшен башлап җибәрде. Анда мәктәп укучылары татар теленә өйрәнә. Бу хакта Бөтендөнья татар конгрессы матбугат хезмәте хәбәр итә.

Полиция хезмәткәрләре янәсе Казанның «Салават Күпере»торак комплексында булган шартлау турындагы мәгълүматны кире какты. Элегрәк социаль челтәрләрдә һәм мессенджерларда урамда берничә купюра табылуы һәм халык шартлау ишетүе турында хәбәрләр таратыла иде.

Казан мэры Илсур Метшин Татарстан башкаласында яшәүчеләргә изге Рамазан ае тәмамлану уңаеннан котлау белән мөрәҗәгать итте. Котлау тексты шәһәрнең рәсми сайтында бастырылган.

Бүген Казанда, Татарстан шәһәрләрендә һәм районнарында Ураза бәйрәме хөрмәтенә гомумшәһәр балалар һәм гаилә бәйрәмнәре узды. Мөхтәсибәтләр балалар һәм аларның ата-аналары өчен мавыктыргыч һәм файдалы программа әзерләде. Бәйрәмнәр мәчет ишегалларында һәм башка җәмәгать урыннарында – паркларда, җәяүлеләр йөри торган урамнарда, спорт комплексларында узды.Бу хакта ТР Диния нәзарәет матбугат хезмәте хәбәр итә.

Cоциаль фонд россиялеләрне пенсиягә өстәмә түләүләрне «гарантияле» рәсмиләштерүне тәкъдим итүче мошенникларның активлашуы турында кисәтте. Бу хакта РИА Новостига социаль фонд матбугат хезмәтендә хәбәр иттеләр.

Алар нинди эшләрдә эшләячәк, кайсы мәхкәмә бу карарны алыштырган - анысы әйтелми.

31 мартта Галиәсгар Камал исемендәге татар дәүләт академия театрының Универсаль залында «Калеб. Яңа сулыш» концерты узачак. Татарстан Композиторлар берлеге рәисе, Кәрим Тинчурин исемендәге Татар дәүләт драма һәм комедия театры оркестрының сәнгать җитәкчесе һәм баш дирижеры Ильяс Камал билгеләп үткәнчә, әлеге концертта оештыручылар традицион җыр жанрыннан тыш, башка юнәлешләргә дә зур урын бирергә карар кылган. Бу хакта ул «Татар-информ» мәгълүмат агентлыгында узган матбугат очрашуында сөйләде.

Яңа технологияләр акрынлап Казан халкының көндәлек тормышының бер өлешенә әверелә. «Сравни» финанс маркетплейсы үткәргән тикшеренү мәгълүматлары буенча, респондентларның 27 проценты даими рәвештә финанс маркетплейсларыннан файдалана, тагын 39 проценты алар турында белсә дә, әлегә кулланып карамаган. Документ «Татар-информ» агентлыгы карамагында бар.

Росгвардия хезмәткәрләре, Эчке эшләр министрлыгы һәм шәхси сак оешмалары белән берлектә, Татарстанда Ураза гаете вакытында иминлекне тәэмин итте. Ведомствоның матбугат хезмәтендә «Татар-информ» агентлыгына шулай дип белдерделәр.

Россия Банкы төп ставканы еллык 15 процентка кадәр төшерде. Регулятор директорлары 2026 елның 20 мартында күрсәткечне 50 базис пунктына киметү турында карар кабул итте, диелә үзәк банк сайтында.

Поезд пассажирлары состав тоткарлаган өчен компенсация алырга хокуклы, ул соңга калган һәр сәгать өчен билет бәясенең 3 процентын тәшкил итә. Шул ук вакытта, түләүләрнең гомуми күләме билет бәясеннән арта алмый. Әгәр поезд бер сәгать азракка тоткарланса, компенсация каралмаган. Россиянең атказанган юристы Иван Соловьев «Татар-информ» агентлыгы белән әңгәмәсендә шул хакта хәбәр итте.

Бүген Татарстанда көннең икенче яртысында һәм кичен, шулай ук 21 мартта төнлә һәм көндез томан көтелә. Россия Гадәттән тыш хәлләр министрлыгының ТР буенча Баш идарәсендә иминлек чараларын үтәү турында хәбәр иттеләр.

Иминиятләштерү финансларны саклауда мөһим алым булып кала бирә. Күп кенә казанлылар берьюлы берничә полис рәсмиләштерә, әмма күбесендә алар кирәк булачак дигән ышанычы юк. «Сравни» финанс маркетплейсы үткәргән тикшеренү мәгълүматларында шулай диелә, алар «Татар-информ» агентлыгы карамагында бар.

Узган төндә телетапшырулар алып баручы, СССРның халык артисты Олег Басилашвилиның хатыны Галина Мшанская вафат булган. Бу хакта телетапшырулар алып баручы Ника Стрижак Telegram-каналда хәбәр итте.

Казанда яшәүчеләрнең 36 проценты 2025 елда керемнәре үзгәрмәве, 34 проценты - үсеш күзәтелүе, ә 30 проценты керемнәре кимүе хакында хәбәр иткән. «Сравни» финанс маркетплейсы үткәргән тикшеренү мәгълүматларында шулай диелә, алар «Татар-информ» агентлыгы карамагында бар.

Казанда, контракт буенча хәрби хезмәткә сайлап алу пунктында, Пилотсыз системалар гаскәрләре вәкиле белән очрашу булды. Кот кушаматлы хәрби ни өчен нәкъ менә бу юнәлешнең иң перспективалы булуы хакында сөйләде.

Санкт-Петербургның Тау университеты китапханәсендә (Горный университет) Татарстан Республикасының халык рәссамы Рәшит Гыйләҗевның шәхси күргәзмәсе ачылды.

2025 ел нәтиҗәләре буенча шикәр чире белән авыручыларның артуы җитди борчу уята, дип белдерде РФ вице-премьеры Татьяна Голикова Кулланучыларның хокукларын яклау һәм кеше иминлеге өлкәсендә күзәтчелек федераль хезмәте (Роспотребнадзор) коллегиясенең киңәйтелгән утырышында. Бу хакта РИА Новости агентлыгы хәбәр итә.

Габдулла Тукай әдәби музеенда күренекле галим һәм мәгърифәтче Каюм Насыйриның тууына 201 ел тулу уңаеннан аның «Китаб әт-тәрбия» һәм «Әбүгалисина кыйссасы» китаплары тәкъдим ителде. Чарада катнашкан Г.Ибраһимов исемендәге Тел, әдәбият һәм сәнгать институтының Язма мирас үзәге әйдәп баручы фәнни хезмәткәре, филология фәннәре кандидаты Азат Ахунов галимнән калган мирасны барлау һәм аның тулы академик басмасын чыгару мәсьәләсен күтәрде.

Татарстанда IX «Балкыш» фестиваленә әзерлек башланды: анда республиканың барлык төбәкләрендә яшәүче ветераннар 11 номинациядә (вокалдан алып нәфис сүзгә кадәр) сәхнәгә чыгачак. Бу хакта ТР Финанс министрлыгының матбугат хезмәте хәбәр итә.