Мәскәүдә Камал театры спектакльләренең видеоязмаларын күрсәтәләр

(Казан, 10 февраль , «Татар-информ»). Шимбә көнне Мәскәүдә «Бүләк» мәдәни-күңел ачу үзәгендә «Тапкитап» әдәби-театраль проектын ачу тантанасы булды. Бу хакта Мәскәү мөселманнарының Диния нәзарәте хәбәр итә.

Проект «Үлеп яратты» спектакле (режиссер Илгиз Зәйни, авторы Ркаил Зәйдулла) белән ачылды. Аны ТР атказанган артисты, спектакльдә төп рольләрнең берсен башкаручы Миләүшә Наил кызы Шәйхетдинова тәкъдим итте.

Мәскәү мөселманнарының Диния нәзарәте, «Бүләк» мәдәни үзәге һәм Камал театры тәкъдим иткән яңа «Тапкитап» проекты ярдәмендә башкала халкы татар классик әдәбияты текстлары һәм спектакльләрнең видеоязмалары аша татар мәдәниятен өйрәнү мөмкинлеген ала.

Бу спектакль очраклы гына сайланмаган. Үз вакытында анда ата-бабаларыбыз язмышының мөһим вакыйгалары күтәрелә: гаепсез кешеләрне кулга алу, милли республикаларның телен һәм мәдәниятен юкка чыгару, өстәвенә, бу юкка чыгару шул ук этнос вәкилләре көче белән башкарыла.

Соңыннан кунаклар һәм экспертлар спектакльнең барлыкка килү тарихы, милли телнең сакланышы турында фикер алышты һәм «иртәгә кабатланмасын өчен, мин бүген нәрсә эшли алам?» дигән сорауга җавап табарга тырышты.

Кичә ахырында «Бүләк» мәдәни үзәге һәм Г.Камал театры вәкилләре алга таба хезмәттәшлек һәм дуслык билгесе итеп истәлекле бүләкләр алмашты. Шулай ук «Тапкитап» уртак проекты Мәскәү халкының рухи-мәдәни үсешенә этәргеч булыр, дигән өмет булды.

Киләсе видеоязма 22 февральдә булачак. Тамашачылар Мирхәйдәр Фәйзинең «Галиябану» спектакле белән танышачак. Спектакльләр татарча рус телендәге субтитрлар белән бара.