Тинчурин театры өлкәннәр өчен беренче фэнтези - «Карурман» спектаклен тәкъдим итә
(Казан, 3 март, «Татар-информ»). 12 һәм 13 мартта Кәрим Тинчурин исемендәге Татар дәүләт драма һәм комедия театрында Луиза Янсуар һәм Резеда Гарипова пьесасы буенча куелган «Карурман» спектакленең премьерасы була. Бу хакта театрның матбугат хезмәте хәбәр итә.
«Карурман» — өлкәннәр өчен беренче фэнтези-спектаклье. Режиссер-куючы — Резедә Гарипова; рәссам — Илшат Вилданов; композитор — Juna төркеме; вокал — Зәринә Вилданова; дирижер — Ильяс Камал; инструменталь ансамбль җитәкчесе — Евгения Глухова; сәхнәдә сугышу мизгелләрен Артем Куртымов куйган.
Спектакльдә театрның әйдәп баручы артистлары: Россиянең атказанган артисты, Татарстанның халык артисты Зөфәр Харисов, Татарстанның халык артистлары Нуретдин Нәҗмиев, Илгизәр Хәсәнов; Татарстанның атказанган артистлары Люция Галләмова, Зөлфия Зарипова, Рөстәм Гайзуллин, Гөлназ Нәүмәтова һәм башкалар катнаша.
«Карурман» пьесасы тамашачыны кечкенәдән үк билгеле булган геройларны һәм мифларны яңача «укырга», заманча лироэпика һәм фэнтези жанрына куелган вакыйгаларны башка яктан күрергә чакыра.
Премьера 18.30 сәгатьтә башлана.