«Гөлстан» мәдрәсәсендә Чувашия һәм Татарстан шәкертләре чираттагы уку сессиясен тәмамлады
Чувашия Республикасы мөселманнары Диния нәзарәте каршындагы «Гөлстан» мәдрәсәсендә быелгы уку семестрындагы соңгы зачетлар һәм дәресләр үткәрелде.
Читтән торып уку бүлегенең III һәм IV курс шәкертләре Чувашия, Татарстан шәһәрләре һәм авылларыннан белемнәрен арттырырга килде. Бу хакта Россия мөселманнары Дини җыены Үзәкләштерелгән дини оешмасының матбугат хезмәте хәбәр итә.
IV курс шәкертләре өчен әлеге сессия мәдрәсәне тәмамлар алдыннан соңгыдан алдагысы булды – хәзер алар практик дәресләргә йөриячәк һәм чыгарылыш квалификация эшләренә әзерләнәчәк.
Өч атна дәвамында шәкертләр гакыйдә, вәгазь нигезләре, гарәп теле, Коръән тәфсире, тиләвәт, исламда сәүдә мөнәсәбәтләре һ.б. дисциплиналарны үзләштерде. Мәдрәсә мөгаллимнәре – югары һәм махсус белемгә ия имамнар, алар инде күп еллар ислам дисциплиналарын укыта.
«Гөлстан» мәдрәсәсе имам-хатыйблар (ир-атлар) һәм ислам дисциплиналары укытучыларын (хатын-кызлар) әзерли. Мәдрәсәне тәмамлаучылар мөселман мәхәлләләре каршында эшли, мәчет каршындагы якшәмбе мәктәпләрендә олылар һәм балаларны укыта.